Shiraz Mehdi | టాలీవుడ్‌లో మాఫియా రాజ్యం.. చిన్న సినిమాలపై కక్ష సాధింపు: హీరో షిరాజ్ మెహదీ సంచలన వ్యాఖ్యలు!

Shiraz Mehdi | హైదరాబాద్‌లోని సోమాజిగూడ ప్రెస్‌క్లబ్‌లో నిర్వహించిన మీడియా సమావేశంలో హీరో, మూవీ మేకర్ షిరాజ్ మెహదీ తెలుగు సినీ పరిశ్రమపై తీవ్ర సంచలన ఆరోపణలు చేశారు.

Shiraz Mehdi | హైదరాబాద్‌లోని సోమాజిగూడ ప్రెస్‌క్లబ్‌లో నిర్వహించిన మీడియా సమావేశంలో హీరో, మూవీ మేకర్ షిరాజ్ మెహదీ తెలుగు సినీ పరిశ్రమపై తీవ్ర సంచలన ఆరోపణలు చేశారు. టాలీవుడ్‌లో మాఫియా తరహా వ్యవస్థ నడుస్తోందని, చిన్న సినిమాలు, నిర్మాతల గొంతు నొక్కుతున్నారని ఆయన మండిపడ్డారు. తాను నిర్మించి హీరోగా నటించిన ‘ఓ అందాల రాక్షసీ’ చిత్రానికి థియేటర్లు కేటాయించకుండా అన్యాయం చేశారని ఆవేదన వ్యక్తం చేశారు. పెద్ద సినిమాలకు పెద్దపీట వేస్తూ చిన్న చిత్రాలను పక్కన పెడుతున్నారని, క్యూబ్, యూఎఫ్‌ఓ వంటి డిజిటల్ ప్రొవైడర్ల పేరుతో నిర్మాతల నుంచి భారీగా దోపిడీ జరుగుతోందని విమర్శించారు.

ఐనాక్స్, పీవీఆర్, ఏషియన్ ఫిల్మ్స్ వంటి ప్రముఖ మల్టీప్లెక్స్ సంస్థలు చివరి నిమిషంలో చేతులెత్తేశాయని, దీనిపై ఇప్పటికే హైకోర్టు నుంచి సమన్లు కూడా వెళ్లాయని తెలిపారు. చిన్న నిర్మాతలు, టెక్నీషియన్ల సమస్యలను ఫిల్మ్ ఛాంబర్ పట్టించుకోవడం లేదని ఆరోపించారు. ఈ నేపథ్యంలో సినీ పరిశ్రమలోని సమస్యలపై తెలంగాణ ముఖ్యమంత్రి రేవంత్ రెడ్డి ప్రత్యేకంగా జోక్యం చేసుకోవాలని ఆయన విజ్ఞప్తి చేశారు. తనకు ఎన్ని బెదిరింపులు వచ్చినా, ప్రాణాలు పోయినా చిన్న సినిమాల హక్కుల కోసం తన పోరాటం ఆగదని, త్వరలోనే ‘ఓ అందాల రాక్షసీ’ చిత్రాన్ని రీరిలీజ్ చేసి ప్రేక్షకుల ముందుకు తీసుకొస్తామని స్పష్టం చేశారు. ప్రస్తుతం ఆయన చేసిన ఈ వ్యాఖ్యలు టాలీవుడ్‌లో తీవ్ర చర్చనీయాంశంగా మారాయి.