హుషారు, రౌడీబాయ్స్ చిత్రాలతో మంచి గుర్తింపును సంపాదించుకున్నారు యువ హీరో తేజ్ కూరపాటి. ఆయన నటిస్తున్న తాజా చిత్రం ‘నా వెంట పడుతున్న చిన్నాడెవడమ్మా’. వెంకట్ వందెల దర్శకుడు. ముల్లేటి కమలాక్షి, గుబ్బల వెంకటేశ్వర రావు నిర్మించారు. ఈ సినిమా ఫస్ట్లుక్ను ఇటీవల విడుదల చేశారు. ఈ సందర్బంగా తేజ్ కూరపాటి మాట్లాడుతూ ‘నేను సోలో హీరోగా నటిస్తున్న తొలి చిత్రమిది. గ్రామీణ నేపథ్యంలో నడిచే ప్రేమకథగా ఆకట్టుకుంటుంది. ఓ ప్రేమజంట తమకు ఎదురైన కష్టాల్ని ఎలా అధిగమించారన్నది ఆసక్తిగా అనిపిస్తుంది. వినోదానికి పెద్దపీట వేశాం. కథానుగుణంగా మంచి పాటలు కుదిరాయి. ఇటీవల విడుదలైన ‘పుడమిని తడిపే తొలకరి మెరుపుల చినుకమ్మా’ పాటకు మంచి స్పందన లభిస్తున్నది. ఈ తరహా విలేజ్ లవ్స్టోరీ వచ్చి చాలా కాలమైంది. ఇక నుంచి సోలో హీరోగానే నటిద్దానుకుంటున్నా. నా తదుపరి చిత్రం ‘షికారు’ జూన్ 24 విడుదలకానుంది. మరో రెండు చిత్రాల్ని అంగీకరించా’అన్నారు.