నరేష్, మిర్నా మీనన్ జంటగా నటిస్తున్న సినిమా ‘ఉగ్రం’. ఈ చిత్రాన్ని షైన్ స్క్రీన్స్ పతాకంపై సాహు గారపాటి, హరీష్ పెద్ది నిర్మిస్తున్నారు. ఎమోషనల్ యాక్షన్ మూవీగా దర్శకుడు విజయ్ కనకమేడల రూపొందిస్తున్నారు. మే 5న ఈ సినిమా విడుదలకు సిద్ధమవుతున్నది. తాజాగా ఈ చిత్రంలోని రెండో పాట అల్బెలా అల్బెలాను హీరో నాని విడుదల చేశారు. శ్రీచరణ్ పాకాల సంగీతాన్ని అందించిన ఈ పాటకు భాస్కరభట్ల సాహిత్యాన్ని అందించగా రేవంత్, శ్రావణ భార్గవి పాడారు. డ్యూటీ నుంచి విరామం తీసుకున్న ఓ పోలీస్ అధికారి తన కుటుంబంతో సరదాగా సమయాన్ని గడపడాన్ని ఈ పాటలో చిత్రీకరించారు. ఈ పాటలో లొకేషన్స్ ఆహ్లాదకరంగా ఉండి ఆకట్టుకుంటాయని చిత్రబృందం చెబుతున్నారు.