UPI fee | రూ.2,000 దాటిన యూపీఐ లావాదేవీలపై ఎండీఆర్ ఛార్జీలు.. దివాళి తర్వాత అమలు

UPI fee : రూ.2,000 దాటిన యూపీఐ లావాదేవీలపై కేంద్రం ఎండీఆర్ (మర్చంట్ డిస్కౌంట్ రేట్) ఛార్జీలు వసూలు చేయబోతున్న సంగతి తెలిసిందే.

UPI fee : రూ.2,000 దాటిన యూపీఐ లావాదేవీలపై కేంద్రం ఎండీఆర్ (మర్చంట్ డిస్కౌంట్ రేట్) ఛార్జీలు వసూలు చేయబోతున్న సంగతి తెలిసిందే. ఈ ఛార్జీల అమలుపై ఎన్‌పీసీఐ (నేషనల్ పేమెంట్స్ కార్పొరేషన్ ఆఫ్ ఇండియా) కీలక ప్రకటన చేసింది. వచ్చే దివాళి తర్వాత నుంచి ఈ ఛార్జీలు వసూలు చేయబోతున్నట్లు తెలిపింది. ఈ మేరకు యూపీఐ అండ్ స్టీరింగ్ కమిటీ నిర్ణయం తీసుకున్నట్లు మంగళవారం వెల్లడించింది.

ప్రస్తుత పండుగ సీజన్‌ను దృష్టిలో ఉంచుకుని.. పండుగలు ముగిసిన తర్వాత.. అంటే దీపావళి అనంతరం నిర్దేశిత లావాదేవీలపై ఛార్జీలు వసూలు చేస్తామని తెలిపింది. నిజానికి ఈ ఛార్జీల అమలు అక్టోబర్ 15 నుంచే అమలు కావాల్సి ఉంది. కానీ, దసరా, దీపావళి పండుగల్ని దృష్టిలో ఉంచుకుని వాయిదా వేసింది. దీపావళి, ధన్‌తేరాస్ సమయంలో భారీ స్థాయిలో కొనుగోళ్లు ఉంటాయి. దీనిలో యూపీఐ లావాదేవీలు అత్యధికంగా ఉంటాయి. ఈ సమయంలో ఎండీఆర్ ఛార్జీలు అమలు చేస్తూ వ్యాపారులు గందరగోళానికి గురయ్యే అవకాశం ఉంది.

అలాగే, యూపీఐ పేమెంట్స్ ఎకో సిస్టం దెబ్బతినొచ్చు. కొందరు వ్యాపారులు యూపీఐని వాడకుండా నగదు పేమెంట్స్‌వైపు మొగ్గు చూపొచ్చు. అందుకే, వీటన్నింటినీ పరిగణనలోకి తీసుకుని.. దీపావళి వరకు ఈ నిర్ణయాన్ని కేంద్రం వాయిదా వేసింది. ఎండీఆర్‌ ఛార్జీలపై ప్రస్తుతం వ్యాపారులు, ప్రజల నుంచి వ్యతిరేకత వ్యక్తమవుతున్న సంగతి తెలిసిందే. ఈ నేపథ్యంలో ఎండీఆర్ ఛార్జీల అమలు అక్టోబర్ 15 నుంచి వచ్చే జనవరి 1కి వాయిదా పడనుందని ప్రచారం జరిగింది. కానీ, ప్రచారాన్ని తిప్పికొడుతూ.. ఈ నిర్ణయాన్ని దీపావళి తర్వాత నుంచి అమలు చేసేందుకు కేంద్రం నిర్ణయించింది.

రూ.2,000 దాటిన యూపీఐ లావాదేవీలపై 0.4 శాతం ఎండీఆర్ ఛార్జీలు వసూలు చేస్తారు. ఈ ఛార్జీలను వ్యాపారులు.. వినియోగదారులకు బదిలీ చేయకూడదని కేంద్రం ఆదేశించింది. మొత్తం వసూలైన ఎండీఆర్ ఛార్జీల్లో 40 శాతం కస్టమర్ బ్యాంకుకు చెల్లిస్తుంది ప్రభుత్వం. ఆ తర్వాత 30 శాతం పేమెంట్ గేట్‌ వే ఛార్జీలు. 20 శాతం యూపీఐ సంస్థలకు, 10 శాతం ఆ డబ్బు రిసీవ్ చేసుకునే బ్యాంకుకు వెళ్తుంది.