అమెజాన్తో న్యాయ పోరాటం నేపథ్యంలో రిలయన్స్ రిటైల్లో ఫ్యూచర్ రిటైల్ గ్రూప్ విలీనానికి మరో ఆరు నెలల గడువు.. అంటే వచ్చే ఏడాది మార్చి నెలాఖరు వరకు లభించింది. రిలయన్స్ రిటైల్ అండ్ ఫ్యాషన్ లైఫ్ స్టైల్ లిమిటెడ్లో తమ సంస్థ విలీనానికి 2021 సెప్టెంబర్ 30 నుంచి 2022 మార్చి 31 వరకు గడువు లభించిందని రెగ్యులేటరీ ఫైలింగ్లో ఫ్యూచర్ రిటైల్ శుక్రవారం తెలిపింది.
రిలయన్స్ రిటైల్ వెంచర్లో ఫ్యూచర్ గ్రూప్ విలీనానికి గతేడాది రూ.24,713 కోట్ల విలువైన ఒప్పందం కుదిరిన సంగతి తెలిసిందే. రిలయన్స్ రిటైల్, ఫ్యూచర్ రిటైల్ మధ్య కుదిరిన ఒప్పందం ప్రకారం రిలయన్స్ రిటైల్లో ఫ్యూచర్ గ్రూప్ సంస్థలు బిగ్ బజార్, నీల్గిరీస్, ఎఫ్బీబీ, ఈజీడే, సెంట్రల్, బ్రాండ్ ఫ్యాక్టరీ విలీనం అవుతాయి.
దీనికి వ్యతిరేకంగా సుప్రీంకోర్టులోనూ, సింగపూర్ అంతర్జాతీయ మధ్యవర్తిత్వ కోర్టులోనూ గ్లోబల్ ఈ-కామర్స్ దిగ్గజం అమెజాన్ కేసులు వేసింది. 2019 ఆగస్టులో ఫ్యూచర్ అనుబంధ ఫ్యూచర్ కూపన్స్లో అమెజాన్ 49 శాతం (ఫ్యూచర్ రిటైల్లో 7.3 శాతం వాటా) వాటా కొనుగోలు చేసింది. దీని ప్రకారం మూడేండ్ల నుంచి 10 ఏండ్లలో ఫ్యూచర్ రిటైల్ను పూర్తిగా టేకోవర్ చేసే హక్కు అమెజాన్కు దఖలు పడింది.