PVR & INOX Merger | మల్టీపెక్స్ సినిమా థియేటర్ల రంగంలో పోటీ పడుతున్న పీవీఆర్, ఐనాక్స్ లీజర్ ఒక్కటి కానున్నాయి. వీటి విలీనానికి రెండు సంస్థల బోర్డులు ఆదివాంర ఆమోదం తెలిపాయి. పీవీఆర్లో ఐనాక్స్ విలీనం కానున్నది. ఈ విలీనానికి రెండు సంస్థల వాటాదారులతోపాటు స్టాక్ ఎక్స్చేంజ్లు, స్టాక్ మార్కెట్ల నియంత్రణ సంస్థ సెబీ, కాంపిటీషన్ కమిషన్ ఆఫ్ ఇండియా (సీసీఐ) తదితర నియంత్రణ సంస్థల ఆమోదం లభించాల్సి ఉంటుంది.
రెండు సంస్థల విలీనంతో ఏర్పాటైన సంస్థకు అజయ్ బిజ్లీ మేనేజింగ్ డైరెక్టర్గా వ్యవహరిస్తారు. సంజీవ్కుమార్ ఎగ్జిక్యూటివ్ డైరెక్టర్గా, సిద్ధార్థ్ జైన్ నాన్ ఎగ్జిక్యూటివ్-నాన్ ఇండిపెండెంట్ డైరెక్టర్గా కొనసాగుతారు. రెండు సంస్థల విలీనం తర్వాత ఏర్పాటయ్యే మల్టీప్లెక్స్ సంస్థ బోర్డును పునర్వ్యవస్థీకరిస్తారు.
విలీన బోర్డులో మొత్తం 10 మంది డైరెక్టర్లు ఉంటారు. రెండు సంస్థల ప్రమోటర్లకు సమాన సంఖ్యలో డైరెక్టర్లు నియమితులవుతారు. విలీనం తర్వాత పీవీఆర్ ప్రమోటర్లకు 10.62 శాతం, ఐనాక్స్ ప్రమోటర్లు 16.66 శాతం వాటా కలిగి ఉంటారు.