GST on Paratha | పరోటా.. దీని పేరు చెబితేనే నోరూరుతూ ఉంటుంది. మలబార్/ మిక్స్డ్ వెజిటబుల్/ప్లెయిన్ పరోటా అంటే ఆవురావురంటూ తినేస్తారు.. కానీ ఒక్క క్షణం ఆగండి.. అన్ని రకాల ఆహార ధాన్యాలు, తినుబండారాలు, స్వీట్స్, టిఫిన్స్పైనా జీఎస్టీ విధిస్తోంది కేంద్రం.. ఆ జాబితాలోకి పరోటా కూడా వచ్చి చేరిందోచ్.. ఇక ప్యాకేజ్డ్ పరోటాపైన 18 శాతం, చపాతీపైన ఐదు శాతం జీఎస్టీ విధించడం సబబేనని గుజరాత్ అప్పీలేట్ అథారిటీ ఫర్ అడ్వాన్స్ రూలింగ్ (జీఏఏఏఆర్) ఆదేశాలు జారీ చేసింది. వాడిలాల్ ఇండస్ట్రీస్ దాఖలు చేసిన పిటిషన్ను జీఏఏఏఆర్ తోసిపుచ్చింది.
ఎనిమిది రకాల పరోటా మోడల్స్తోపాటు అదే గోధుమ పిండితో తయారుచేసే చపాతీకి ఐదు శాతం జీఎస్టీ విధిస్తున్నారని వాడిలాల్ ఇండస్ట్రీస్ దాఖలు చేసిన పిటిషన్లో పేర్కొంది. చపాతీతోపాటు పరోటాకు కూడా ఐదు శాతం జీఎస్టీ మాత్రమే వసూలు చేయాలని అప్పీల్ చేసింది. కూరగాయలు, ఉల్లిగడ్డ, మెంతి తదితర ఆకుకూరలు, మసాలా దినుసులను కేవలం టేస్ట్, ఫ్లేవర్ కోసమేనని, అన్ని రకాల పరోటాలు ఒక్కటేనని వాదించింది.
వాడీలాల్ ఇండస్ట్రీస్ వాదనను గుజరాత్ అప్పీలేట్ అథారిటీ ఫర్ అడ్వాన్స్ రూలింగ్ తోసిపుచ్చింది. చపాతీ, పరోటాలను గోధుమ పిండితో తయారుచేసినా.. చపాతీ లేదా రోటీ మాదిరిగా మూడు నాలుగు నిమిషాల్లో రెడీ కాదని పేర్కొంది. అందువల్లే పరోటాలపై 18 శాతం జీఎస్టీ విధించడం సబబేనని స్పష్టం చేసింది. చపాతీ లేదా రోటీ వేడి చేసి తినేయొచ్చునని, ప్రత్యేకంగా ప్రాసెస్ చేయాల్సిన అవసరం లేదన్నది. పిజ్జా బ్రెడ్ కూడా హీట్ అండ్ కుకింగ్ చేసి తినేయవచ్చునని, కనుక దానిపై 5 శాతం జీఎస్టీ సబబేనని పేర్కొంది.
వాడీలాల్ ఇండస్ట్రీస్ అందచేసిన పరోటాలపై వనస్పతి ఆయిల్, బ్రెడ్ ఇంప్రూవర్, పచ్చి బఠానీలు, కాలిఫ్లవర్, ధనియాల పొడి, యాలకులు, లవంగాలతోపాటు దానిమ్మ గింజలు, క్యారెట్ తదితరాలు వాడాల్సి ఉంటుందని జీఏఏఏఆర్ గుర్తు చేసింది. చపాతీ లేదా రోటీ నేరుగా వేడి చేసి తినేయొచ్చునని పేర్కొంది.