అక్టోబర్‌ 1 నుంచి కార్డ్‌ నిబంధనలు అమలు

బ్యాంక్‌లు, ఎన్‌బీఎఫ్‌సీలు క్రెడిట్‌, డెబిట్‌ కార్డుల జారీకి నిర్దేశించిన నిబంధనల అమలు గడువును రిజర్వ్‌బ్యాంక్‌ మరో మూడు నెలలు పొడిగించింది.

న్యూఢిల్లీ, జూన్‌ 21: బ్యాంక్‌లు, ఎన్‌బీఎఫ్‌సీలు క్రెడిట్‌, డెబిట్‌ కార్డుల జారీకి నిర్దేశించిన నిబంధనల అమలు గడువును రిజర్వ్‌బ్యాంక్‌ మరో మూడు నెలలు పొడిగించింది. కార్డ్‌ల జారీపై మాస్టర్‌ డైరెక్షన్‌లో నిబంధనలు జూలై 1 నుంచి అమలుకావాల్సి ఉండగా, కొన్ని నిబంధనల అమలుకు గడువుతేదీని పరిశ్రమ భాగస్వామ్య పక్షాల వినతి మేరకు అక్టోబర్‌ 1కి పొడిగిస్తూ ఆర్బీఐ ఒక సర్క్యులర్‌ జారీచేసింది. క్రెడిట్‌ కార్డ్‌ యాక్టివేషన్‌కు మరింత సమయాన్ని ఇవ్వడం వంటి నిబంధనల అమలు వాయిదాపడ్డాయి. అవి..

• మాస్టర్‌ డైరెక్షన్‌ ప్రకారం కార్డుల్ని జారీచేసే బ్యాంక్‌లు, ఎన్‌బీఎఫ్‌సీలు..క్రెడిట్‌ కార్డ్‌ జారీ అయిన 30 రోజులకుపైబడినా కస్టమర్‌ యాక్టివేట్‌ చేసుకోకపోతే, దానిని యాక్టివేట్‌ చేయడానికి కార్డ్‌హోల్డర్‌ నుంచి ఓటీపీ ఆధారిత అనుమతిని తీసుకోవాలి.
• అలాగే క్రెడిట్‌ కార్డ్‌ యాక్టివేషన్‌కు ఖాతాదారు నుంచి అనుమతి లభించకపోతే, అందుకు సంబంధించి ఖాతాదారు నుంచి ధృవీకరణ కోరిన తేదీ నుంచి ఏడు రోజుల్లోగా ఖాతాదారుపై ఎటువంటి భారం వేయకుండా క్రెడిట్‌ కార్డ్‌ ఖాతాను మూసివేయాలి.
• కార్డ్‌పై మంజూరుచేసిన క్రెడిట్‌ లిమిట్‌ను కార్డ్‌హోల్డర్‌ ఏ సమయంలోనూ దాటకుండా కార్డ్‌ జారీ సంస్థలు చూడాలి.
• చెల్లించని ఛార్జీలు, వాటిపై చక్రవడ్డీని వేయడానికి సంబంధించిన నిబంధన అమలును సైతం ఆర్బీఐ జూలై 1 నుంచి 3 నెలలు వాయిదా వేసింది. మాస్టర్‌ డైరెక్షన్‌లో మిగిలిన నిబంధనల అమలుకు నిర్దేశించిన జూలై 1 గడువులో మార్పులేదని రిజర్వ్‌బ్యాంక్‌ తెలిపింది.