ఎల్‌ఐసీ జీవన్‌ ధార II

ప్రభుత్వ రంగ జీవిత బీమా దిగ్గజం లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) శుక్రవారం ఓ సరికొత్త ప్లాన్‌ను పరిచయం చేసింది. ‘

ముంబై, జనవరి 19: ప్రభుత్వ రంగ జీవిత బీమా దిగ్గజం లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) శుక్రవారం ఓ సరికొత్త ప్లాన్‌ను పరిచయం చేసింది. ‘జీవన్‌ ధార II (ప్లాన్‌ 872)’ పేరుతో దీన్ని సంస్థ చైర్‌పర్సన్‌ సిద్ధార్థ మహంతి ప్రారంభించారు. సోమవారం నుంచి ఇది కొనుగోలుదారులకు అందుబాటులో ఉంటుంది. ఇదో ఇండివిడ్యువల్‌, సేవింగ్స్‌, డిఫర్డ్‌ యాన్యుటీ, నాన్‌-లింక్డ్‌, నాన్‌-పార్టిసిపేటింగ్‌ ప్లాన్‌. దీని యూనిక్‌ ఐడెంటిఫికేషన్‌ నంబర్‌ (యూఐఎన్‌): 512N364V01. సంస్థ ఏజెంట్ల ద్వారాగానీ, ఇతర మధ్యవర్తిత్వ వేదికలద్వారానైనా లేదా నేరుగా ఆన్‌లైన్‌లో ఈ ప్లాన్‌ను కొనుగోలు చేయవచ్చు.

పాలసీ విశేషాలు

• 20 ఏండ్లు దాటినవారే ఈ ప్లాన్‌కు అర్హులు. అలాగే ఎంచుకునే యాన్యుటీ ఆప్షన్‌నుబట్టి గరిష్ఠ వయస్సు 80, 70, 65 ఏండ్లుగా ఉన్నది.
• ప్లాన్‌ మొదలైన దగ్గర్నుంచి యాన్యుటీ హామీ ఉంటుంది. పాలసీదారులకు 11 యాన్యుటీ ఆప్షన్స్‌ను ఎల్‌ఐసీ అందుబాటులో ఉంచింది.
• వయసు పెరిగినకొద్దీ అధిక యాన్యుటీ రేట్లు అందుకోవచ్చు. అధిక ప్రీమియంలకు ప్రోత్సాహకాలు అందుతాయి.
• వాయిదాల వ్యవధిలో లైఫ్‌ కవరేజీ.
• పాలసీదారులు రెగ్యులర్‌, సింగిల్‌ ప్రీమియంలను ఎంచుకోవచ్చు.
• సింగిల్‌ లైఫ్‌ యాన్యుటీ, జాయింట్‌ లైఫ్‌ యాన్యుటీలుంటాయి.
• రెగ్యులర్‌ ప్రీమియంలో వాయిదా వ్యవధి ఐదేండ్ల నుంచి 15 ఏండ్లదాకా ఉంటుంది. సింగిల్‌ ప్రీమియంలోనైతే ఏడాది నుంచి 15 ఏండ్లు. మీ అవసరాలకు అనుగుణంగా యాన్యుటీ చెల్లింపులు మొదలైనప్పట్నుంచి ఇవి వర్తిస్తాయి.
• యాన్యుటీ చెల్లింపులు నెలకోసారి, 3 నెలలకోసారి, 6 నెలలకోసారి, ఏడాదికోసారి చేసుకోవచ్చు.
• పాలసీ వ్యవధి వాయిదా కాలంలో ఎప్పుడైనాసరే సింగిల్‌ ప్రీమియంగా అదనపు మొత్తాన్ని చెల్లించి యాన్యుటీని పెంచుకునే వెసులుబాటు.
• ఈ ప్లాన్‌లో పాలసీదారుడు చనిపోతే వచ్చే ఆ మొత్తాన్ని ఒకేసారి లేదా వాయిదాల్లో నామినీలు తీసుకోవచ్చు. ఇందుకు తగ్గట్టుగా ఆ మేరకు ఆయా ప్రయోజనాలు అందుతాయి.
• పాలసీపై రుణ సదుపాయం లభిస్తుంది.