పని చేయని ఫుడ్ డెలివరీ యాప్‌లు… పలు నగరాల్లో జొమాటో, స్విగ్గీ డౌన్‌

న్యూఢిల్లీ: సాంకేతిక లోపం కారణంగా ఫుడ్ డెలివరీ యాప్‌లు జొమాటో, స్విగ్గీ డౌన్‌ అయ్యాయి. బుధవారం మధ్యాహ్నం 2 గంటల సమయంలో దేశవ్యాప్తంగా పలు నగరాల్లో ఈ యాప్‌లు పని చేయలేదు. అమేజాన్‌ వెబ్‌ సర్వీసెస్‌ ఫ్లాట్‌ఫామ్‌పై పనిచేసే వెబ్‌సైట్లకు సాంకేతిక సమస్యలు వచ్చినట్లు సమాచారం. దీంతో జొమాటో, స్విగ్గీ వినియోగదారులు సుమారు అర గంట సేపు ఇబ్బందులు ఎదుర్కొన్నారు. ఫుడ్ ఆర్డర్లు బుక్‌ కాకపోవడంపై పలువురు ఆయా సంస్థల కస్టమర్‌ కేర్‌కు ఫిర్యాదు చేశారు.

కాగా, వెబ్‌సైట్‌ అంతరాయాలతోపాటు వినియోగదారుల ఫిర్యాదులను వివిధ మార్గాల నుంచి సేకరించడంతోపాటు ట్రాక్ చేసే డౌన్‌డెటెక్టర్ కూడా ఫుడ్ డెలివరీ యాప్‌లు జొమాటో, స్విగ్గీ డౌన్‌ గురించి పేర్కొంది. మధ్యాహ్నం 2.07 గంటలకు దేశంలోని పలు నగరాల్లో జొమాటోలో 3,030, స్విగ్గీలో 789 అంతరాయాలు నమోదైనట్లు వెల్లడించింది.

మరోవైపు సాంకేతిక సమస్య వల్ల వినియోగదారులకు కలిగిన అసౌకర్యానికి ఫుడ్ డెలివరీ యాప్‌లు జొమాటో, స్విగ్గీ క్షమాపణ తెలిపాయి. పరిస్థితిని చక్కదిద్దేందుకు తమ బృందాలు పని చేస్తున్నాయని పేర్కొన్నాయి. అయితే అంతరాయం ఏర్పడిన అర గంట తర్వాత ఈ రెండు ఫుడ్‌ డెలివరీ యాప్‌లు తిరిగి పనిచేయడం ప్రారంభించాయి.