Audi – Entry level EV Car | ప్రముఖ లగ్జరీ కార్ల తయారీ సంస్థ ఆడీ (Audi) సైతం ఎలక్ట్రిక్ కార్ల తయారీపై ఫోకస్ చేస్తోంది. ఆల్ న్యూ ఎంట్రీ లెవెల్ ఎలక్ట్రిక్ కారును ఆవిష్కరించేందుకు రంగం సిద్ధం చేస్తున్నది. ప్రస్తుతం ఎస్యూవీ కార్లకు డిమాండ్ పెరుగుతున్న తరుణంలో స్మాల్ సెడాన్ లేదా కంపాక్ట్ ఎస్యూవీ మాదిరిగా ఆడీ ఆల్ న్యూ ఎలక్ట్రిక్ ఎంట్రీ లెవల్ కారు ఉంటుందని తెలుస్తున్నది. 2027లో ఆల్ న్యూ ఎలక్ట్రిక్ కారు మార్కెట్లోకి వస్తుందని సమాచారం. ఆడీ క్యూ4 ఈ-ట్రాన్ దిగువన ఈ కారు ఉంటుందని, దీనిపేరు ఏ2 లేదా క్యూ2 అని పెట్టొచ్చునని ఆడీ సీఈఓ గెర్నాట్ డోల్నర్ తెలిపారు.
ఫోక్స్ వ్యాగన్ గ్రూప్ ఎంఈబీ ప్లాట్ఫామ్పై రూపుదిద్దుకుంటుందని తెలుస్తున్నది. చైనా ఈవీ కార్ల తయారీ సంస్థలకు పోటీగా ఆడీ దూకుడుగా ముందుకు దూసుకెళ్లాలని తలపోస్తున్నది. చౌక ధరకే చైనా ఈవీ కార్లు అందుబాటులోకి రావడం కార్ల తయారీ సంస్థలకు ఆందోళన కలిగిస్తున్నది. ఆడి ఇటీవలే మార్కెట్లోకి క్యూ6ఈ-ట్రాన్ ప్రవేఫెట్టింది. అంతకుముందు ఈ-ట్రాన్ జీటీ, క్యూ4 ఈ-ట్రాన్, క్యూ8 ఈ-ట్రాన్ కార్లు ఆవిష్కరించింది. తాజాగా ఎంట్రీ లెవల్ ఈవీ కారు ఆవిష్కరణతో ప్రపంచవ్యాప్తంగా ఎలక్ట్రిక్ కార్ల మార్కెట్లో ఎంట్రీ లెవల్ ఈవీ ప్రధాన వాటా పొందుతుందని భావిస్తున్నారు.