Elon Musk | ట్విట్టర్లో వచ్చేవారం రెండు కొత్త ఫీచర్లు పరిచయం చేస్తామని ఆ సంస్థ అధినేత ఎలన్ మస్క్ తెలిపారు. ట్విట్టర్ వేదికగా ఓ నెటిజన్ అడిగిన ప్రశ్నకు సమాధానం ఇస్తూ ఎలన్ మస్క్ ఈ సంగతి చెప్పారు.
ట్విట్టర్ను ఎలన్ మస్క్ టేకోవర్ చేశాక పలు మార్పులు తెస్తున్నారు. ఇతర యాప్ లకు భిన్నంగా ఉండటానికి కొత్త ఫీచర్లు తెస్తున్నారు.
ట్విట్టర్ లో పోస్ట్ చేసే వీడియోలకు 15 సెకన్ల ఫార్వర్డ్, బ్యాక్ బటన్లు జత చేయాలని కోరుతూ ట్వీట్ చేసిన జెస్సీ డాగెర్టీ అనే నెటిజన్.. దాన్ని ఎలన్ మస్క్ ఖాతాకు ట్యాగ్ చేశాడు. దీనిపై రియాక్టయ్యారు ఎలన్ మస్క్. ‘వచ్చేవారం పిక్-ఇన్-పిక్ మోడ్ తోపాటు వీడియో ఫార్వార్డ్, బ్యాక్ బటన్లు వస్తాయంటూ ట్వీట్ చేశారు. పిక్-ఇన్-పిక్ మోడ్ సాయంతో యూట్యూబ్ తరహాలో నెటిజన్లు చిన్న విండోలో వీడియో వీక్షిస్తూ వెబ్ పేజీలో తమ పని చేసుకోవచ్చు. ఫార్వర్డ్ లేదా బ్యాక్ బటన్ సాయంతో వీడియోను ముందూ వెనుకలకు జరుపవచ్చు. వాట్సాప్, యూ ట్యూబ్ వంటి యాప్స్లో ఈ ఫీచర్లు ఉన్నాయి.
ఎలన్ మస్క్ ట్వీట్ చూశాక నెటిజన్లు రియాక్టయ్యారు. ఇటువంటి ఫీచర్ల కోసం చాలా కాలంగా ఎదురు చూస్తున్నామని, వీటిని పరిచయం చేస్తున్నందుకు ధన్యవాదాలు అని కామెంట్లు చేస్తున్నారు. గతేడాది ట్విట్టర్ టేకోవర్ చేసినప్పటి నుంచి సంస్థ సీఈఓగా వ్యవహరించిన ఎలన్ మస్క్.. ఇటీవలే లిండా యాకరినోను సీఈఓగా నియమించారు.