Visit:
ఉమ్మడి ఆదిలాబాద్‌ జిల్లా వ్యాప్తంగా కొన్ని ప్రైవేటు ఆసుపత్రులు ఆర్‌ఎంపీలు, పీఎంపీలను గుప్పిట్లో పెట్టుకొని వైద్యంతో వ్యాపారం చేస్తున్నాయి. వాళ్ల రిఫరెన్స్‌తో ఆసుపత్రికి వచ్చే రోగి చెల్లించే బిల్లులో 20 శాతం నుంచి కొన్ని ఆసుపత్రులైతే 50 శాతం వరకు కమిషన్‌ ఆఫర్‌ చేస్తున్నట్లు తెలిసింది. దీంతో కొందరు ఆర్‌ఎంపీలు, పీఎంపీలకు అధిక కమిషన్‌ ఇచ్చే ఆసుపత్రులకు రోగులను పంపేందుకు పోటీ పడుతున్నారు. తమ పరిధిలోని గ్రామాల్లో ఎవరికి ఏ ఆరోగ్య సమస్య వచ్చినా.. తమకు కమిషన్‌ ఎక్కవగా ఇచ్చే ఆసుపత్రికి వెళ్లమంటూ రిఫర్‌ చేస్తున్నారు. నిత్యం చూసే ఆర్‌ఎంపీ చెప్పడంతో వారిపై నమ్మకంతో చెప్పిన ఆసుపత్రికి వెళ్లిన రోగులు ఇబ్బందులు పడాల్సి వస్తున్నది. వచ్చిన ఆసుపత్రిలో సరైన వైద్యులు, వైద్యసేవలు అందక ప్రాణాల మీదకు తెచ్చుకోవాల్సి వస్తున్నది.
– మంచిర్యాల, నవంబర్‌ 30 (నమస్తే తెలంగాణ ప్రతినిధి)
మంచిర్యాల జిల్లా జైపూర్‌ మండలంలోని పవనూర్‌కు చెందిన గజ్జెల సత్తమ్మకు జ్వరం వచ్చింది. రక్తంలో ఇన్‌పెక్షన్‌తోపాటు, తీవ్రమైన జ్వరంతో బాధపడుతున్న ఆమెను మంచిర్యాలలోని ఓ ప్రైవేటు ఆసుపత్రికి తీసుకెళ్లారు. సీరియస్‌ ఉంది వేరే ఆసుపత్రికి తీసుకెళ్లాలని అక్కడి వైద్యులు సూచించారు. ఈ లోగా తెలిసిన ఆర్‌ఎంపీ ఒకరు బెల్లంపల్లి చౌరస్తా సమీపంలోని ఓ ఆసుపత్రిలో బాగా చూస్తారని చెప్పడంతో అక్కడికి వెళ్లారు. బోగీ నాడు ఉదయం 11 గంటలకు ఆసుపత్రిలో అడ్మిట్‌ చేస్తే రెండు రోజులు ఉన్నాక దీపావళి పండుగ రోజు ఉదయం 11 గంటల వరకు ఏం కాదని, బాగానే ఉన్నారంటూ వైద్యులు చెప్పుకొచ్చారు. అనంతరం అదే రోజు రాత్రి 10 గంటలకు బాధితురాలి భర్త దగ్గరకు వచ్చి ఐబీ చౌరస్తాలోని స్కానింగ్‌ సెంటర్‌కు వెళ్లి ఒక్కసారి తల స్కాన్‌ చేయించుకొని రమ్మన్నారు. స్కాన్‌ చేయించుకొని వచ్చాక ఆ రిపోర్ట్‌ చూపిస్తూ తలలోని నరాల్లో బ్లడ్‌ క్లాట్స్‌ (నల్ల మచ్చలు) ఉన్నాయి.
మా ఆసుపత్రిలో గుండె డాక్టర్‌ లేడు నువ్వు ఎక్కడికన్న తీసుకుపోవాలని చెప్పారు. మిగిలిన బిల్లు చెల్లించి వెళ్లాలని ఆసుపత్రి సిబ్బంది ఒత్తిడి తెచ్చారు. బాధితురాలి భర్త గొడవకు దిగాడు. ముందు వెళ్లండి.. డబ్బులు తర్వాత చూసుకుందాం.. అని చెప్పి పంపించారు. అక్కడి నుంచి కరీంనగర్‌ ప్రభుత్వ ఆసుపత్రికి, అనంతరం వరంగల్‌ ఎంజీఎం ఆసుపత్రికి తీసుకెళ్లారు. అప్పటికే ఆలస్యం కావడంతో చికిత్స పొందుతూ గజ్జెల సత్తమ్మ మృతి చెందింది. సత్తెమ్మ మృతదేహాన్ని ఇంటికి తీసుకొస్తుంటే సదరు ప్రైవేటు ఆసుపత్రి నిర్వాహకులు ఫోన్‌ చేసి డబ్బులు కట్టాలని అడిగారు. దానికి మృతిరాలి భర్త నేను మృతదేహం తీసుకొని మీ ఆసుపత్రికే తీసుకొస్తానని అనడంతో ఆసుపత్రి నిర్వాహకులు వెనక్కి తగ్గారు.
మంచిర్యాల జిల్లా కన్నెపల్లి మండలానికి చెందిన కోటగిరి సంతోష్‌కు జూన్‌2వ తేదీన యాక్సిడెంట్‌ అయ్యింది. కాలువాపుతో బాధపడుతూ మంచిర్యాల ప్రభుత్వ ఆసుపత్రిలో జాయిన్‌ అయ్యాడు. ఈలోగా స్థానికంగా తెలిసిన ఆర్‌ఎంపీ ఒకరు మంచిర్యాలలో నాకు తెలిసిన స్పెషలిస్టు డాక్టర్‌ ఉన్నారు. బాగా చూస్తారు అని చెప్పడంతో ఆయన మాటలు నమ్మి ఎంఆర్‌వో ఆఫీసుకు సమీపంలోని ఓ ప్రైవేటు ఆసుపత్రికి వెళ్లాడు. గవర్నమెంట్‌ ఆసుపత్రిలో సిమెంట్‌ పట్టి వేస్తే నయమైపోతుందని డాక్టర్లు చెప్తే.. సదరు ప్రైవేటు ఆసుపత్రిలో మాత్రం ఆపరేషన్‌ చేసి ప్లేట్‌ వేయాల్సిందేనని చెప్పారు. డాక్టర్లు చెప్పారంటే నిజమే కావచ్చని నమ్మి ఆపరేషన్‌ చేయించుకున్నాడు. మూడు రోజులు ఆసుపత్రిలో ఉంచుకొని డిశ్చార్జి చేశారు. మరో ఐదు రోజులకు రమ్మన్నారు. రెండోసారి వెళ్లినప్పుడు తగ్గిపోతుందని చెప్పారు.
అనంతరం వారం రోజులకు ఆపరేషన్‌ చేసిన కాలుకు ఇన్‌పెక్షన్‌ మొదలైంది. ఆపరేషన్‌ చేయించుకున్న ఆసుపత్రికి వెళ్లే మరోసారి వారం రోజులు అడ్మిట్‌ చేసుకున్నారు. ఎంతకీ తగ్గకపోవడంతో అనుమానం వచ్చిన పేషెంట్‌ వేరే దగ్గరకి వెళ్లాలా అని అడిగితే.. వద్దు అని చెప్పారు. అలా మూడు, నాలుగు రోజులు గడిచాక మాతో కాదంటూ వైద్యులు చేతులు ఎత్తేశారు. దీంతో కరీంనగర్‌లోని ఓ ప్రైవేటు ఆసుపత్రికి వెళ్లగా.. హైదరాబాద్‌ వెళ్లాలని సూచించారు. దీంతో బంజారాహిల్స్‌లోని ఓ ప్రైవేటు ఆసుపత్రికి వెళ్లగా.. పూర్తిగా పాడైపోయిన కాలును చూసి అక్కడి వైద్యులు షాక్‌ అయ్యారు. ప్లేట్‌ వేసిన ప్రాంతం మొత్తం చీము పట్టి ఉంది. కాలుకు మీది భాగం, కింది భాగంలోని కండరాళ్లు అన్ని పూర్తిగా దెబ్బతిని కుల్లిపోయాయి. క్యూర్‌ అయ్యే పరిస్థితి కనిపించడం లేదు. మోకాలు కింద భాగంలో ఉన్న కాలు తీసేస్తేనే బతికే ఛాన్స్‌ ఉంది. తీసేయక తప్పదని చెప్పి కాలు తీసేశారు. ఆర్‌ఎంపీ చెప్పిన మాట నమ్మి మంచి ఆసుపత్రి అని వెళ్తే కాలే పోగొట్టుకోవాల్సి వచ్చిదంటూ బాధితుడు వాపోతున్నారు.
ఆర్‌ఎంపీలే మార్కెటింగ్‌ ఏజెంట్లు..
మంచిర్యాల జిల్లాలోని చాలా ప్రైవేటు ఆసుపత్రులు ఏరియావారీగా ఆర్‌ఎంపీ వైద్యులను మార్కెటింగ్‌ ఏజెంట్లుగా నియమిస్తున్నాయి. మంచిర్యాల జిల్లాలో లక్షెట్టిపేట, బెల్లంపల్లి, చె న్నూర్‌, జైపూర్‌, మందమర్రి ఏరియాల్లో ఇలా చాలా ఆసుపత్రుల ఏజెంట్లు ఉన్నారు. ఆసిఫాబాద్‌ జిల్లాలోనైతే కొన్ని ప్రైవేటు ఆసుపత్రులు ఇష్టారాజ్యంగా పెట్రేగిపోతున్నాయి. కాగజ్‌నగర్‌, సిర్పూర్‌, బెజ్జూర్‌, లింగాపూర్‌, తిర్యాణి ప్రాం తాల్లో ఏజెంట్లను పెట్టుకొని దందా నడిపిస్తున్నాయి. కొన్ని ఆసుపత్రుల్లో ఇల్లీగల్‌ అబార్షన్లు కూడా చేస్తున్నారనే వినికిడి ఉన్నది. లింగనిర్ధారణ చేసి అబార్షన్‌ చేసేందుకు కాగజ్‌నగర్‌లోని ఓ ఆసుపత్రి ప్రత్యేక ప్యాకేజీలు పెట్టిమరి పని చేస్తున్నట్లు తెలిసింది. మంచిర్యాల, కరీంనగర్‌, నిర్మల్‌, నిజామాబాద్‌ ప్రాంతాల నుంచి వచ్చే స్థానికేతరులు సదరు ఆసుపత్రిలో అబార్షన్లు చేయించుకుంటున్నట్లు సమాచారం.
నిర్మల్‌ జి ల్లాలోనూ ఆర్‌ఎంపీలు, పీఎంపీలకు అడ్డం పెట్టుకొని చేసే మెడికల్‌ దందా నడుస్తున్నది. ఆ జి ల్లాలో ఖానాపూర్‌, ముథోల్‌, భైంసా, బాసర, క డెం ప్రాంతాల్లో మార్కెటింగ్‌ ఏజెంట్‌ల వ్యవస్థ నడుస్తున్నది. ఆదిలాబాద్‌ జిల్లాలోనూ దాదాపు ఇదే పరిస్థితి ఉంది. ఏరియాల వారిగా ఉంటే మార్కెటింగ్‌ ఏజెంట్లు.. తమ పరిధిలోని మండలాల ఆర్‌ఎంపీ, పీఎంపీల టచ్‌లో ఉండి వారికి నజరానాలు ఆఫర్‌ చేయడం, అందజేయడం రో గులను తమ ఆసుపత్రికి తరలించుకొని పోవడం సాధారణమైన విషయంగా మారిపోయింది. ఆర్‌ఎంపీలకు ప్యాకేజీలతోపాటు కొన్ని ప్రైవేటు హాస్పిటల్స్‌ ప్రత్యేక టూర్లు ఏర్పాటు చేస్తున్నా యి.
దావత్‌లు ఇస్తున్నాయి. మంచిర్యాల జి ల్లాలో ఇటీవల జరిగిన ఆర్‌ఎంపీ, పీఎంపీల అ సోసియేషన్‌ ఎన్నికల రోజున ఓ ఆసుపత్రి భోజనాలు పెట్టించడంతోపాటు మందు దావత్‌ స్పా న్సర్‌ చేసినట్లు సమాచారం. కాగా ఇటీవల ఓ మండలానికి చెందిన ఆర్‌ఎంపీ, పీఎంపీల వా ట్సాప్‌ గ్రూప్‌లో ‘మన కమ్యూనిటీకి ఓ ఆసుపత్రి యాజమాన్యం రూ.10 వేలు సాయం చేయడం జరిగింది. మనకు సాయం చేసి సదరు హాస్పిటల్‌కు మన సహకారాన్ని అందించాలని కార్యవ ర్గం తరఫున కోరుతున్నాం”అంటూ ఓ ఆర్‌ఎంపీ మెస్సేజ్‌ చేసిన స్క్రీన్‌షాట్‌ సోషల్‌ మీడియాలో వైరల్‌గా మారింది. దీంతో జిల్లాలో తెరచాటున విచ్చలవిడిగా జరుగుతున్న ఈ వ్యవహారం చర్చనీయాంశంగా మారింది. ఆర్‌ఎంపీలను అడ్డంపెట్టుకొని జిల్లాలోని కొన్ని ఆసుపత్రులు పెట్రేగిపోతుంటే అధికార యంత్రాంగం అడ్డుకట్టవేయకపోవడంపై విమర్శలు వెల్లువెత్తుతున్నాయి.
కఠిన చర్యలు తీసుకుంటాం..
ఆర్‌ఎంపీలు, పీఎంపీలను అడ్డం పెట్టుకొని వైద్యాన్ని వ్యాపారంగా మార్చిన ప్రైవేటు ఆసుపత్రులపై ఇప్పటికే ఫోకస్‌ పెట్టాం. ఇలాంటి పనులు చేసే కొన్ని ఆసుపత్రుల కారణంగా వైద్య వ్యవస్థ మొత్తానికి చెడ్డపేరు వస్తున్నది. ఇకపై ఎట్టి పరిస్థితుల్లోనూ ఉపేక్షించేది లేదు. ఇప్పటికే ఈ విషయంపై దృష్టి సారించాం. బాధితులు ఆధారాలతో సహా వస్తే ఏ ఆసుపత్రైనా సరే కఠిన చర్యలు తీసుకోడానికి మేం సిద్ధంగా ఉన్నాం.
– డాక్టర్‌ యెగ్గెన శ్రీనివాస్‌, తెలంగాణ స్టేట్‌ లీగల్‌ ఎథికల్‌ అండ్‌ యాంటీ-క్వాకెరీ కమిటీ మెంబర్‌
