కవ్వాల్‌కు టైగర్‌ ఆగయా

కవ్వాల్‌ టైగర్‌ రిజర్వుడ్‌ అడవుల్లోని ఇందన్‌పెల్లి బీట్‌లో పెద్దపులి సంచరిస్తూ తన ఉనికి చాటుకుంటున్నది. చాలా రోజుల తర్వాత తిరిగిరావడంతో అటవీ సమీప గ్రామాల ప్రజల్లో భయాందోళన కనిపిస్తున్నది. 2016లో ఆదిలాబాద్‌ జిల్లా ఉట్నూర్‌ మండలం బీర్సాయిపేట, 2018లో మంచిర్యాల జిల్లా జన్నారం మండలం ఇందన్‌పెల్లి, 2021లో నిర్మల్‌ జిల్లా కడెం మండలం గంగాపూర్‌, 2022లో కడెం ప్రాజెక్టు, 2024లో జన్నారం మండలం జూవ్విగూడ అడవుల్లో సంచరించింది.

• చాలా రోజుల తర్వాత ఇందన్‌పెల్లి అడవుల్లో సంచారం
• తిప్పేశ్వర్‌ నుంచి వచ్చినట్లు భావిస్తున్న అధికారులు
• అటవీ గ్రామాల్లో అప్రమత్తంగా ఉండాలని హెచ్చరిక

జన్నారం, నవంబర్‌ 30 : కవ్వాల్‌ టైగర్‌ రిజర్వుడ్‌ అడవుల్లోని ఇందన్‌పెల్లి బీట్‌లో పెద్దపులి సంచరిస్తూ తన ఉనికి చాటుకుంటున్నది. చాలా రోజుల తర్వాత తిరిగిరావడంతో అటవీ సమీప గ్రామాల ప్రజల్లో భయాందోళన కనిపిస్తున్నది. 2016లో ఆదిలాబాద్‌ జిల్లా ఉట్నూర్‌ మండలం బీర్సాయిపేట, 2018లో మంచిర్యాల జిల్లా జన్నారం మండలం ఇందన్‌పెల్లి, 2021లో నిర్మల్‌ జిల్లా కడెం మండలం గంగాపూర్‌, 2022లో కడెం ప్రాజెక్టు, 2024లో జన్నారం మండలం జూవ్విగూడ అడవుల్లో సంచరించింది. 2025లో తిర్యాణి అటవీ ప్రాంతంలో పెద్దపులి అడుగులను అధికారులు గుర్తించారు. ఇక్కడ ఆవాసం ఏర్పాటు చేసుకోలేక తిరిగి వెళ్లిపోగా, తాజాగా ఇందన్‌పెల్లి(నార్త్‌)బీట్‌ సమీపంలోని మామిడితోటలో ప్రత్యక్షమైంది. ఐదు రోజుల క్రితం ఆవుపై దాడి చేసి చంపింది. ఇది మహారాష్ట్రలోని తిప్పేశ్వర్‌ టైగర్‌ రిజర్వుడ్‌ నుంచి జోడేఘాట్‌ మీదుగా వచ్చి ఉంటుందని అధికారులు భావిస్తున్నారు. అటవీ సమీప గ్రామాల ప్రజలు అప్రమత్తంగా ఉండాలని, చేలల్లోకి ఒంటరిగా వెళ్లవద్దంటూ సిబ్బంది అవగాహన కల్పిస్తున్నారు.

2012లో టైగర్‌జోన్‌
కేంద్ర ప్రభుత్వం 2012లో కవ్వాల్‌ టైగర్‌ రిజర్వుడ్‌ను ఏర్పాటు చేసింది. 892 చ.కి.మీటర్లు కోర్‌ ఏరియాగా, 1123 చ.కి.మీటర్లు బఫర్‌ జోన్‌గా గురించారు. ఇది ఉమ్మడి ఆదిలాబాద్‌ జిల్లాలో విస్తరించి ఉంది. పెద్దపులి ఆవాసం కోసం కోట్లాది రూపాయలు వెచ్చించారు. కుంటలు, చెరువులు తవిచి సోలార్‌ మోటర్లు ఏర్పాటు చేశారు. బేస్‌క్యాంప్‌ సిబ్బంది అడవుల్లో ఉండేందుకు భవనాలు నిర్మించారు. శాకాహార జంతువుల కోసం 1080 హెక్టార్లలో గడ్డి మైదానాలు పెంచుతున్నారు. ప్రస్తుతం ఇక్కడికి వచ్చిన పులి ఆవాసం ఏర్పాటు చేసుకునేందుకు ఏర్పాట్లు చేస్తున్నట్లు అటవీ అధికారులు తెలిపారు. కానీ, పులి ఇక్కడ ఉంటుందో.. లేక తిరిగి వెళ్లిపోతుందో వేచి చూడాల్సి ఉంది.

ఆవాసం కోసం అన్ని వసతులు కల్పించాం : రాంమ్మోహన్‌, జన్నారం ఎఫ్‌డీవో
పెద్దపులి కవ్వాల్‌ అడవుల్లో ఆవాసం ఏర్పాటు చేసుకునేందుకు అనువుగా అన్ని వసతులు కల్పించాం. తాగు నీరు కోసం చెరువులు, కుంటలు, సోలార్‌మోటార్లు ఏర్పాటు చేశాం. శాకాహార జంతువులను విరివిగా పెంచుతున్నాం. ప్రస్తుతం వచ్చిన పులి ఇక్కడే ఉంటుందనే నమ్మకం ఉంది. దానికి ఎలాంటి హాని జరుగకుండా ప్రజలంతా సహకరించాలి. అటవీ సమీప గ్రామాల ప్రజలు అప్రమత్తంగా ఉండాలి. చేలల్లోకి ఒంటరిగా వెళ్లవద్దు.

రైలు ప్రమాదంలో ఆడ పులి మృతి
కాగజ్‌నగర్‌, నవంబర్‌ 30 : కాగజ్‌నగర్‌ డివిజన్‌ పరిధిలోని పులులు సురక్షితంగా ఉన్నాయని కాగజ్‌నగర్‌ డివిజన్‌ అటవీ శాఖ అధికారి సుశాంత్‌ బోబడే ఓ ప్రకటనలో తెలిపారు. మహారాష్ట్రలోని రాజుర పట్టణానికి 30 కిలోమీటర్ల దూరంలో వీర్గాం సమీపంలో వేకువజామున రైలు ప్రమాదంలో ఆదివారం ఆడ పులి మృతి చెందినట్లు పేర్కొన్నారు. కాగజ్‌నగర్‌ అడవుల్లో ఆడ పులిని ఆదివారం సాయంత్రం గుర్తించినట్లు, అక్కడ మృతి చెందిన ఆడ పులి కాగజ్‌నగర్‌ డివిజన్‌కు చెందినది కాదని ఆయన తెలిపారు. సిర్పూర్‌ (టీ) మండల శివారులో రైలు ప్రమాదంలో పులి మృతి చెందినట్లు సోషల్‌ మీడియాలో వైరల్‌కాగా, అదంతా తప్పని సుశాంత్‌ బోబడే పేర్కొన్నారు.