ఊబకాయం బాల్యాన్ని మహమ్మారిలా కలవర పెడుతున్నది. ఆహారం రూపంలో తీసుకున్న క్యాలరీలకు, ఖర్చుపెట్టిన శక్తికి మధ్య సమతూకం లోపించడమే దీనికి ప్రధాన కారణం. కుటుంబ చరిత్ర, జన్యువుల ప్రభావాన్నీ కాదనలేం. ఊబకాయం వల్ల తలెత్తే మధుమేహం, గుండె కవాటాల వ్యాధులు, వివిధ రకాలైన క్యాన్సర్ల ముప్పును గుర్తించడానికి కుటుంబ చరిత్రనూ దృష్టిలో ఉంచుకోవాలని వైద్యులు సూచిస్తున్నారు. సమతుల ఆహారం, క్రమం తప్పని వ్యాయామంతో బరువును అదుపులో ఉంచుకోవచ్చు. భవిష్యత్తు తరాలకు మంచి జన్యువులను అందించవచ్చు.
జన్యుపరమైన లోపాలకు జీవనశైలి అలవాట్లు, పర్యావరణపరమైన ప్రభావాలు తోడైతే పిల్లల్లో ఊబకాయం ముప్పు మరింత పెరుగుతుంది. తగిన పోషకాహార వ్యూహాలతో ఈ ఇబ్బందిని నివారించవచ్చు. కన్నవాళ్లు కూడా తమ పిల్లలు వయసుకు తగినంత బరువు, ఎత్తు ఉండేలా చూసుకోవాలి. ప్రత్యేక పరిస్థితుల్లో మాత్రమే బరువు తగ్గించే శస్త్రచికిత్సలను సిఫారసు చేస్తారు వైద్యులు. ఊబకాయాన్ని నివారించడంలో ఔషధాల కంటే జీవనశైలిదే ముఖ్యపాత్ర.