OTT | బాక్సాఫీస్ దగ్గర ఎప్పుడో విడుదలైన సినిమాలు ఓటీటీలో మళ్లీ ప్రత్యక్షం కావడం ఇటీవల రివాజుగా మారింది. అలా ఓటీటీ ఎక్కిన చిత్రమే ‘టియర్స్ ఆఫ్ ద సన్’. 2003లో వెండితెరపై విడుదలైన ఈ సినిమా అప్పట్లో సంచలనం సృష్టించింది. వసూళ్ల పరంగా పెద్దగా విజయం సాధించకపోయినా.. సినిమా సబ్జెక్ట్, టేకింగ్ విమర్శకుల ప్రశంసలు అందుకుంది. తాజాగా నెట్ఫ్లిక్స్లో విడుదలైన ఈ చిత్రం రికార్డు స్ట్రీమింగ్ నమోదు చేసుకుంటున్నది. కథలోకి వెళ్తే… నైజీరియాలో భీకర అంతర్యుద్దం జరుగుతుంటుంది. జాతి, మత విద్వేషాలు పెచ్చరిల్లడంతో దేశమంతా హత్యాకాండ కొనసాగుతుంది. అధికారాన్ని హస్తగతం చేసుకున్న మిలటరీ దళాలు ఆ దేశ అధ్యక్షుణ్ని కూడా హతమార్చేస్తాయి. ఇలాంటి అరాచక పరిస్థితుల్లో ప్రజల మానప్రాణాలకు రక్షణ లేకుండా పోతుంది.
నైజీరియాలో ఉన్న విదేశీయులపై కూడా సైన్యం దాడి చేస్తుంటుంది. అమెరికాకు చెందిన డాక్టర్ కెండ్రిక్స్ (మోనికా బెలూచి) నైజీరియాలో పేదలకు వైద్య సేవలు అందిస్తుంటుంది. దేశంలో అరాచకం తలెత్తిన నేపథ్యంలో ఆమెను అక్కడి నుంచి తప్పించాలని అమెరికన్ ఎంబసీ నుంచి ఆదేశాలు వస్తాయి. లెఫ్టినెంట్ వాటర్ (బ్రూస్ విల్లీస్) ఆధ్వర్యంలోని బృందం రహస్యంగా నైజీరియాలో దిగుతుంది. కెండ్రిక్స్ నిర్వహిస్తున్న వైద్య శిబిరానికి చేరుకుంటుంది. ఆమెను తమ వెంట రావాల్సిందిగా వాటర్ కోరుతాడు. అక్కడున్న బాధితులను వదిలిపెట్టి తాను రాలేనంటుందామె. వాళ్లను కూడా కాపాడతామని మాటిస్తే గానీ.. కదలనంటుంది. తప్పనిసరి పరిస్థితుల్లో వాళ్లందరినీ కాపాడతానని వాటర్ మాటిస్తాడు. అందరినీ తీసుకొని అడవి దారిలో కామెరూన్ సరిహద్దులకు చేరుకోవాలని నిర్ణయిస్తాడు. ఈ దారిలో వాళ్లకు ఎలాంటి ఇబ్బందులు ఎదురయ్యాయి, నైజీరియా సైనికుల నుంచి ఎలా తప్పించుకున్నారన్నది మిగిలిన కథ.