ఫ్రిజ్‌ లేకపోయినా తాజాగా

వారానికి ఒకసారి సంతకు వెళ్లి కూరగాయలు కొనుక్కొస్తాం. కానీ రెండు రోజులు గడవకముందే ఆకుకూరలు వాడిపోవడం, కూరగాయలు తేమ కోల్పోవడం, ఫ్రిజ్‌లో పెట్టినా త్వరగా పాడవడం చాలామంది ఇళ్లలో కనిపించే సమస్య.

వారానికి ఒకసారి సంతకు వెళ్లి కూరగాయలు కొనుక్కొస్తాం. కానీ రెండు రోజులు గడవకముందే ఆకుకూరలు వాడిపోవడం, కూరగాయలు తేమ కోల్పోవడం, ఫ్రిజ్‌లో పెట్టినా త్వరగా పాడవడం చాలామంది ఇళ్లలో కనిపించే సమస్య. ఇలాంటి ఇబ్బందులకు పరిష్కారంగా ఇప్పుడు వంటగదుల్లోకి అడుగుపెడుతున్నాయి ‘వెజిటబుల్‌ ప్రిజర్వేషన్‌ బ్యాగ్‌’లు. కూరగాయల తాజాదనాన్ని కాపాడుతూ ఆహార వృథాను తగ్గించడంలో ఇవి మనకు సాయపడతాయి.

మనం వాడే సాధారణ ప్లాస్టిక్‌ కవర్లు కూరగాయలకు ఊపిరాడకుండా చేస్తాయి. వాటి నుండి వచ్చే తేమ ఆ కవర్ల లోపలే పేరుకుపోయి, బ్యాక్టీరియా చేరి త్వరగా కుళ్లిపోతాయి. కానీ, వెజిటబుల్‌ ప్రిజర్వేషన్‌ బ్యాగులు అలా కాదు. ఇవి ప్రకృతి సిద్ధమైన కాటన్‌, మస్లిన్‌ వస్ర్తాలతో లేదా ప్రత్యేకమైన ఫుడ్‌గ్రేడ్‌ మెష్‌ మెటీరియల్‌తో తయారవుతాయి. ఇవి కూరగాయలకు సరిపడా గాలి ఆడేలా చేస్తూ, వాటి ఆయుష్షును పెంచుతాయి.

ఈ బ్యాగుల ప్రత్యేకత ఏంటంటే, ఇవి కూరగాయలలోని తేమను సమతుల్యంగా ఉంచుతాయి. ఆకుకూరలు, బెండకాయలు, క్యారెట్లలాంటి వాటిని కాటన్‌ బ్యాగులలో ఉంచి, కాస్త నీళ్లు చల్లి ఫ్రిజ్‌లో పెడితే.. వారం రోజులైనా ఇప్పుడే తోట నుంచి కోసుకొచ్చినట్లు తాజాగా ఉంటాయి. అలాగే, ఇవి కూరగాయలు విడుదల చేసే ‘ఇథిలిన్‌’ గ్యాస్‌ను బయటకు పంపేయడం వల్ల త్వరగా ముదిరిపోవు. ఉతికి, శుభ్రం చేసి ఎన్నిసార్లు అయినా తిరిగి వాడుకో గలిగిన ఈ బ్యాగులు పర్యావరణ హితకారులు కూడా!