విద్యార్థి స్కూల్‌ బ్యాగులో తాచుపాము

పాఠశాలకు వెళ్తున్న ఓ విద్యార్థి స్కూల్‌ బ్యాగులోనుంచి తాచుపాము బయటపడడంతో విద్యార్థులంతా బెంబేలెత్తిపోయారు. ఈ సంఘటన మంగళవారం వరంగల్‌ జిల్లా నెక్కొండలో చోటుచేసుకుంది. విద్యార్థి కుటుంబ సభ్యులు తెలిపిన వివరాల ప్రకారం..

• నెక్కొండలో ఘటన

నెక్కొండ, ఫిబ్రవరి 6 : పాఠశాలకు వెళ్తున్న ఓ విద్యార్థి స్కూల్‌ బ్యాగులోనుంచి తాచుపాము బయటపడడంతో విద్యార్థులంతా బెంబేలెత్తిపోయారు. ఈ సంఘటన మంగళవారం వరంగల్‌ జిల్లా నెక్కొండలో చోటుచేసుకుంది. విద్యార్థి కుటుంబ సభ్యులు తెలిపిన వివరాల ప్రకారం.. నెక్కొండకు చెందిన ఈదునూరి విజేందర్‌-మమత కుమారుడు వివేక్‌ స్థానిక ప్రభుత్వ ప్రాథమిక పాఠశాలలో ఒకటో తరగతి చదువుతున్నాడు. ఎప్పటిలాగే వివేక్‌ తోటి విద్యార్థులతో కలిసి పాఠశాలకు వెళ్తుండగా బ్యాగులోంచి తాచుపాము బయటకు వచ్చింది.

వివేక్‌ వెనుక నడుస్తున్న తోటి విద్యార్థులు పాము పాము అని గట్టిగా అరవడం, ఇంతలో అది రోడ్డుపై వెళ్లిపోయింది. అయితే వివేక్‌ ఇంట్లోకి సోమవారం పాము వచ్చిందని, ఎంత వెతికినా ఇంట్లో దొరకలేదని కుటుంబ సభ్యులు తెలిపారు. అదే పాము స్కూల్‌ బ్యాగులోకి చేరి ఉంటుందని భావించారు. మొత్తానికి పాముతో ఎలాంటి హాని జరుగకపోవడంతో అందరూ ఊపిరిపీల్చుకున్నారు.