పాత కక్షలతో మహిళ దారుణ హత్య

ఇంట్లో గొడవలతో తండ్రిని చితకబాదుతున్న ఓ వ్యక్తి.. ఎదురుగా కనిపించిన ఓ మహిళపై దాడికి పాల్పడ్డాడు. పాత కక్షలను మనస్సులో పెట్టుకుని ఆమెను దారుణంగా హతమార్చాడు.

కామారెడ్డి రూరల్‌, జూన్‌ 18: ఇంట్లో గొడవలతో తండ్రిని చితకబాదుతున్న ఓ వ్యక్తి.. ఎదురుగా కనిపించిన ఓ మహిళపై దాడికి పాల్పడ్డాడు. పాత కక్షలను మనస్సులో పెట్టుకుని ఆమెను దారుణంగా హతమార్చాడు. ఈ ఘట న సోమవారం రాత్రి కామారెడ్డి జిల్లా తిమ్మక్‌పల్లి గ్రామంలో జరిగింది. తిమ్మక్‌పల్లిలో రాగుల లక్ష్మి (80), రాగుల రాజశేఖర్‌ కుటుంబాలు పక్కపక్కనే నివాసముంటున్నాయి. రెండు కుటుంబాల మధ్య గతంలో గొడవలు జరిగాయి. సోమవారం సాయంత్రం తన తండ్రితో గొడవపడిన రాజశేఖర్‌.. తండ్రిని చితకబాదుతూ బయటకు లాక్కొచ్చాడు. అదే సమయంలో రోడ్డు మీదుగా వెళ్తున్న లక్ష్మి కనిపించడంతో తండ్రిని వదిలిపెట్టి ఆమెపై దాడికి దిగాడు. ఇటుక పెల్లలు తీసుకుని తలపై, చెవిపై బలంగా కొట్టడంతో ఆమె తీవ్రంగా గాయపడింది. ఆమెతో ఉన్న మనువడిపైనా దాడి చేశాడు. ఇది గమనించిన స్థానికులు లక్ష్మిని హుటాహుటిన కామారెడ్డి ఏరియా దవాఖానకు తరలించారు. పరిస్థితి విషమంగా ఉండటంతో హైదరాబాద్‌కు తీసుకెళ్తుండగా మార్గమధ్యంలో లక్ష్మి మృతి చెందింది. తన తల్లిని చంపిన రాజశేఖర్‌పై చర్యలు తీసుకోవాలని మృతురాలి కుమారుడు పెద్ద నర్సింహులు పోలీసులకు ఫిర్యాదు చేశాడు. ఈ మేరకు కేసు దర్యాప్తులో ఉందని దేవునిపల్లి ఎస్సై రాజు తెలిపారు.