విద్యుదాఘాతంతో ముగ్గురు రైతుల మృతి

విద్యుదాఘాతంతో ముగ్గురు రైతులు మృతి చెందిన ఘటన మెదక్‌, నాగర్‌కర్నూల్‌, జోగుళాంబ గద్వాల జిల్లాల్లో చోటుచేసుకున్నది. మెదక్‌ జిల్లా మనోహరాబాద్‌ మండలం రంగాయిపల్లికి చెందిన రైతు రాజబోయిన లక్ష్మణ్‌ (42) వ్యవసాయం చేసుకుంటూ జీవనం కొనసాగిస్తున్నాడు. సోమవారం రాత్రి లక్ష్మణ్‌ పంటకు నీళ్లు పెట్టేందుకు తన పొలం వద్దకు వెళ్లాడు.

కోడేరు/అయిజ/మనోహరాబాద్‌, అక్టోబర్‌ 27 : విద్యుదాఘాతంతో ముగ్గురు రైతులు మృతి చెందిన ఘటన మెదక్‌, నాగర్‌కర్నూల్‌, జోగుళాంబ గద్వాల జిల్లాల్లో చోటుచేసుకున్నది. మెదక్‌ జిల్లా మనోహరాబాద్‌ మండలం రంగాయిపల్లికి చెందిన రైతు రాజబోయిన లక్ష్మణ్‌ (42) వ్యవసాయం చేసుకుంటూ జీవనం కొనసాగిస్తున్నాడు. సోమవారం రాత్రి లక్ష్మణ్‌ పంటకు నీళ్లు పెట్టేందుకు తన పొలం వద్దకు వెళ్లాడు. బోరుమోటర్‌ను ఆన్‌చేసే క్రమంలో స్టార్టర్‌ను పరిశీలిస్తుండగా ప్రమాదవశాత్తు విద్యుత్తుషాక్‌కు గురై అక్కడికక్కడే మృతిచెందాడు. జోగుళాంబ గద్వాల జిల్లా అయిజ మండలం పర్దీపురం గ్రామానికి చెందిన చిన్న ఈరన్నగౌడ్‌కు ఇద్దరు కుమార్తెలతోపాటు కొడుకు ఉరుకుందుగౌడ్‌ (17) సంతానం. ఉరుకుందుగౌడ్‌ మంగళవారం ఉదయం పొలం వద్ద మిరప పంటకు నీళ్లు పారబెట్టేందుకు వెళ్లాడు. బోరు మోటర్‌ను ఆన్‌ చేసే క్రమంలో విద్యుత్తుషాక్‌కు గురై అక్కడికక్కడే మృతి చెందాడు. నాగర్‌కర్నూల్‌ జిల్లా కోడేరు మండలం మైలారం గ్రామానికి చెందిన రైతు వెంకటేశ్వర్లు (55) మంగళవారం ఉదయం తన పొలంలో సాగు చేసిన వరి పంటకు నీళ్లు పారించడానికి వెళ్లాడు. కరెంట్‌ మోటర్‌ను ఆన్‌ చేస్తుండగా అప్పటికే తెగి పడిన విద్యుత్తు తీగకు తగిలి విద్యుదాఘాతంతో అక్కడికక్కడే మృతి చెందాడు.