Srinivas Goud | హాస్టళ్ల మూసివేత నిర్ణయాన్ని వెంటనే వెనక్కి తీసుకోవాలి : మాజీ మంత్రి శ్రీనివాస్‌ గౌడ్‌ డిమాండ్‌ 

Srinivas Goud | హాస్టళ్ల మూసివేత నిర్ణయాన్ని వెంటనే వెనక్కి తీసుకోవాలని మాజీ మంత్రి శ్రీనివాస్‌ గౌడ్‌ డిమాండ్‌ చేశారు.

మహబూబ్ నగర్ : హాస్టళ్ల ( Hostels  ) మూసివేత నిర్ణయాన్ని వెంటనే వెనక్కి తీసుకోవాలని మాజీ మంత్రి శ్రీనివాస్‌ గౌడ్‌ ( Srinivas Goud ) డిమాండ్‌ చేశారు. జిల్లా కేంద్రంలోని క్యాంపు కార్యాలయంలో నిర్వహించిన విలేకరుల సమావేశంలో ఆయన మాట్లాడారు. తెలంగాణ ఉద్యమ సమయంలో ఉద్యమాన్ని బలహీనపరి చేందుకు అప్పటి ప్రభుత్వం హాస్టళ్లలో నీరు, విద్యుత్ సరఫరా నిలిపివేసి విద్యార్థులను బయటకు పంపించే కుట్ర మాదిరిగానే నేడు కాంగ్రెస్ ప్రభుత్వం కూడా అదే తరహా చర్యలకు పాల్పడుతోందని విమర్శించారు.

ఉస్మానియా యూనివర్సిటీ లా కాలేజీకి సంబంధించిన ఈ-1, ఈ-2, డీ వసతి గృహాల్లో నీరు, విద్యుత్ సరఫరా నిలిపివేయడం దుర్మార్గమైన చర్య అని పేర్కొన్నారు. ప్రభుత్వ ఉద్యోగ నోటిఫికేషన్ల కోసం ఎదురుచూస్తూ, పోటీ పరీక్షలకు సిద్ధమవుతున్న విద్యార్థులను బలవంతంగా ఇంటికి పంపించడం సరికాదని సూచించారు. అశోక్‌నగర్‌కు వచ్చిన రాహుల్ గాంధీ ఆరు నెలల్లో 2 లక్షల ఉద్యోగాలు భర్తీ చేస్తామని హామీ ఇచ్చిన విషయాన్ని ముఖ్యమంత్రి, కాంగ్రెస్ ప్రభుత్వం ఎందుకు పట్టించుకోవడం లేదని నిలదీశారు.

బీఆర్ఎస్ ప్రభుత్వం ఉద్యోగ నోటిఫికేషన్లు ఇచ్చి పరీక్షలు నిర్వహిస్తే.. కాంగ్రెస్ ప్రభుత్వం కేవలం నియామక పత్రాలు అందించి తామే ఉద్యోగాలు ఇచ్చామని గొప్పలు చెప్పుకుంటుందని విమర్శించారు.ఉద్యోగ నోటిఫికేషన్లు ఇవ్వకుండా హాస్టళ్లలో నీరు, కరెంటు నిలిపివేసి విద్యార్థులను ఇబ్బందులకు గురిచేయడం తగదని, అవసరమైతే ప్రైవేట్ భవనాలు అద్దెకు తీసుకుని వసతి గృహాలు నిర్వహించాలని సూచించారు.

తెలంగాణ ఉద్యమ సమయంలో హాస్టళ్లు మూసివేస్తే ఫంక్షన్ హాళ్లలో విద్యార్థులకు భోజనాలు ఏర్పాటు చేశామని, ఇప్పుడు కూడా అవసరమైతే విద్యార్థుల సమస్యలను తెలుసుకుని ప్రత్యామ్నాయ వసతి ఏర్పాట్లపై ఆలోచిస్తామని వెల్లడించారు. ఉద్యోగ నియామక ప్రకటనలు వచ్చేంతవరకు విద్యార్థులకు అన్ని సౌకర్యాలతో హాస్టళ్లు కొనసాగించాలి. స్టడీ సెంటర్లు నిర్వహించాలి. హాస్టళ్ల మూసివేత నిర్ణయాన్ని వెంటనే వెనక్కి తీసుకోవాలని డిమాండ్‌ చేశారు.సమావేశంలో గ్రంధాలయ సంస్థ మాజీ చైర్మన్ రాజేశ్వర్ గౌడ్, మార్కెట్ కమిటీ మాజీ చైర్మన్ ఆంజనేయులు, పార్టీ పట్టణ అధ్యక్షులు శివరాజ్, బీఆర్ఎస్వి నాయకులు గణేష్ తదితరులు పాల్గొన్నారు.