Burns crop | నీళ్లు లేక కరెంట్ రాక.. సూర్యాపేట జిల్లాలో పంటను కాలబెట్టిన కౌలు రైతు

అన్నదాతలు అప్పులు చేసి సాగు చేస్తే సరిపడా నీళ్లు, కరెంట్ అందక పంటలు చేతికొచ్చే సమయంలో ఎండిపోతుండటంతో కలత చెందిన రైతన్నలు కంటికి రెప్పలా కాపాడుకున్న పంటలకు నిప్పు పెట్టడం రాష్ట్రంలో రైతుల పరిస్థితికి అద్దం పడుతున్నది.

సూర్యాపేట : తెలంగాణలో సాగు దుర్భరంగా మారింది. అన్నదాతలు అప్పులు చేసి సాగు చేస్తే సరిపడా నీళ్లు, కరెంట్ అందక పంటలు చేతికొచ్చే సమయంలో ఎండిపోతుండటంతో కలత చెందిన రైతన్నలు కంటికి రెప్పలా కాపాడుకున్న పంటలకు నిప్పు పెట్టడం రాష్ట్రంలో రైతుల పరిస్థితికి అద్దం పడుతున్నది. తాజాగా సూర్యాపేట జిల్లాలో మరో రైతు పంటకు నిప్పు పెట్టాడు. కౌలుకు తీసుకున్న నాలుగెకరాలలో మూడెకరాలు ఎండిపోవడంతో తీవ్ర ఆవేదన చెందిన రైతు పంటకు నిప్పు పెట్టాడు.

వివరాల్లోకి వెళ్తే..సూర్యాపేట జిల్లా ఆత్మకూర్ (ఎస్) మండల కేంద్రంలో యాతాకుల మల్లయ్య అనే రైతు తాను కౌలుకు చేస్తున్న నాలుగెకరాల పంట చేతికి వచ్చే సమయంలో కరెంట్, నీళ్లు సరిగా అందక మూడెకరాల పంట ఎండిపోయింది. దీంతో తీవ్ర ఆవేదనకు గురైన సదరు రైతు పంటకు నిప్పంటించాడు. కౌలు ఎట్లా కట్టాలి, పెట్టుబడి ఎట్లా ఎల్లాలి, కుటుంబం ఎట్లా గడవాలి అని బాధిత కుటుంబ సభ్యులు కన్నీరు మున్నీరవుతున్నారు. ప్రభుత్వం ఇకనైనా స్పందించి పంటలకు సరిపడా నీళ్లు, కరెంట్‌ సరఫరా చేయాలని కోరుతున్నారు.