Visit:
పెద్దపల్లి : పెద్దపల్లి జిల్లాలోని బీఆర్ఎస్ పార్టీ కార్యాలయంలో దీక్ష దివస్ ఘనంగా నిర్వహించారు. ముందుగా జిల్లా కేంద్రంలో అమరవీరుల స్థూపానికి నివాళులు అర్పించి, అనంతరం తెలంగాణ తల్లి విగ్రహానికి పూలమాల వేసి, జిల్లా పార్టీ కార్యాలయంలో కేసీఆర్ చిత్ర పటానికి పాలాభిషేకం చేశారు. అనంతరం మాజీ మంత్రి కొప్పుల ఈశ్వర్ మాట్లాడుతూ.. నవంబర్‌ 29 అంటే ఒక చరిత్ర అని, ఉద్యమాన్ని మలుపుతిప్పిన రోజు అని అన్నారు.
వలస పాలనలోని ఉమ్మడి ఆంధ్రప్రదేశ్‌లో నియంతృత్వానికి, ప్రజాస్వామ్యానికి మధ్య జరిగిన పద్నాలుగేండ్ల సమరమే తెలంగాణ పోరాటం అన్నారు. దశాబ్దాల ఆకాంక్షను అక్షరసాక్షాత్కారం చేసిన పోరాటయోధుడు కేసీఆర్ అని కీర్తించారు. ‘తెలంగాణ వచ్చేదాకా నా ప్రాణం పోదు అని నాకు ధైర్యం చెప్పిన నాయకుడు కేసీఆర్’ అని చెప్పారు. 2009, నవంబర్‌ 29న కరీంనగర్‌లోని ఉత్తర తెలంగాణ భవన్‌ నుంచి సిద్దిపేట దగ్గర ఉన్న రంగధాంపల్లిలో ఏర్పాటు చేసిన దీక్షా స్థలానికి కేసీఆర్ బయల్దేరగా.. అల్గునూరు చౌరస్తాలో పోలీసులు చుట్టుముట్టి అడ్డుకున్న విషయాన్ని ఆయన గుర్తుచేశారు.
కేసీఆర్ రోడ్డు మీదే దీక్షకు కూర్చున్నారని, బలవంతంగా ఖమ్మం జైలుకు తరలించారని, దాంతో ఆయన జైలులోనే దీక్షను ప్రారంభించారని కొప్పుల చెప్పారు. డిసెంబర్‌ 1న ‘నేను లేకున్నా ఉద్యమం నడపాలి’ అని కేసీఆర్ చెప్పిన విషయాన్ని గుర్తుచేశారు. దీక్షవల్ల ఆరోగ్యం క్షీణించడంతో డిసెంబర్‌ 3న కేసీఆర్‌ను హైదరాబాద్‌లోని నిమ్స్‌కు తరలించారని, ‘తెలంగాణ వస్తే జైత్రయాత్ర, లేకుంటే నా శవయాత్ర’ అని నిమ్స్‌ దవాఖాన నుంచే కేసీఆర్ పిలుపునిచ్చారని తెలిపారు.
దాంతో డిసెంబర్‌ 7న అప్పటి ముఖ్యమంత్రి అధ్యక్షతన జరిగిన అఖిలపక్ష సమావేశంలో అన్ని పార్టీలు తెలంగాణ ఏర్పాటుకు మద్దతిచ్చాయని కొప్పుల చెప్పారు. కేసీఆర్ ఆరోగ్యం క్షీణించిందని, ఇక తమ చేతుల్లో ఏమీ లేదని డిసెంబర్‌ 8న వైద్యులు ప్రకటించారని, ఫలితంగా కేంద్ర ప్రభుత్వం తెలంగాణ ఏర్పాటు దిశగా నిర్ణయం తీసుకుందని తెలిపారు. వాటిన్నింటి ఫలితమే 2014 జూన్‌ 2న తెలంగాణ రాష్ర్ట ఆవిర్భావం అని అన్నారు. అరవై ఏండ్ల కల సాకారమవడంలో కథా నాయకుడై ముందుండి నడిపిందీ కేసీఆరే అని చెప్పారు.
ఈ చరిత్ర ఎవరు చెరిపినా చెరిగేది కాదని కొప్పుల ఈశ్వర్ అన్నారు. పీసీసీ చీఫ్ మహేష్ గౌడ్ నేడు అజ్ఞానిలా మాట్లాడుతున్నాడని, ఉద్యమ సమయంలో ఆయన ఎక్కడ ఉన్నాడో తెలియదని విమర్శించారు. ఆంధ్ర పాలకుల సంకలో దూరి తెలంగాణ ఉద్యమకారులపై గన్ పెట్టిన చరిత్ర ముఖ్యమంత్రి రేవంత్ రెడ్డిదని మండిపడ్డారు. తెలంగాణ రాష్ట్రంలో తెలంగాణ తనమే అస్తిత్వంగా ప్రతి రంగంలో తెలంగాణ ముద్ర ఉండేటట్టుగా కేసీఆర్ పరిపాలన సాగిందని అన్నారు.
కేసీఆర్ సర్కార్‌ తర్వాత ప్రజాపాలన పేరుతో అధికారంలోకి వచ్చిన రేవంత్‌రెడ్డి తెలంగాణ తల్లి రూపాన్నే మార్చారని, అలాగే బతుకమ్మ చీరలకు రాంరాం పెట్టి ఇందిరమ్మనే తెలంగాణ తల్లిగా ముందుకు తెస్తున్నారని విమర్శించారు. కాంగ్రెస్ ప్రభుత్వం ఇచ్చిన వాగ్దానాలన్నీ ఉత్త మాటలయ్యాయని మండిపడ్డారు. 6 గ్యారెంటీలను 420 హామీలను గాలికొదిలేశారని అన్నారు. రాష్ట్రం ఉన్నంత కాలం కేసీఆర్ చరిత్ర ఉంటుందని చెప్పారు.
ఈ కార్యక్రమంలో మాజీ మంత్రి కొప్పుల ఈశ్వర్, పార్టీ అధ్యక్షులు, మాజీ ఎమ్మెల్యేలు కోరుకంటి చందర్, దాసరి మనోహర్ రెడ్డి, పుట్ట మధుకర్, మాజీ గ్రంథాలయ సంస్థ చైర్మన్ రఘువీర్ సింగ్, మూల విజయ రెడ్డి, దాసరి ఉష, గంట రాములు, కౌశిక్ హరి, బీఆర్ఎస్ పార్టీ పట్టణ అధ్యక్షులు ఉప్పు రాజ్ కుమార్, బీఆర్ఎస్ పార్టీ నాయకులు, కార్యకర్తలు పాల్గొన్నారు.
