సింగరేణి థర్మల్ పవర్ ప్లాంట్‌కు బెస్ట్ ప‌ర్ఫార్మ‌ర్ అవార్డు

హైద‌రాబాద్ : సింగరేణి కొల‌రీస్ కంపెనీ లిమిటెడ్ (ఎస్.సి.సి.ఎల్) యాజమాన్యంలోని సింగరేని థర్మల్ పవర్ ప్లాంట్ (ఎస్.టి.సి.పి)కు దక్షిణ భారత స్థాయి “బెస్ట్ పవర్ ప్లాంట్ పెర్ఫార్మర్” అవార్డు ల‌భించింది. ముంబైకి చెందిన ప్రసిద్ధ లాభాపేక్షలేని సంస్థ మిషన్ ఎనర్జీ ఫౌండేషన్ ఈ అవార్డును ప్రకటించింది. ఫౌండేషన్ శుక్రవారం నిర్వహించిన జాతీయవ్యాప్త వెబ్ సెమినార్ ముగింపు సమావేశంలో ఈ అవార్డును ప్రకటించింది. అవార్డును ప్ర‌క‌టిస్తూ నిర్వాహకులు ఎస్‌సీసీఎల్ బృందం కృషిని ప్ర‌శంసించింది.

ఈ సదస్సులో భారతదేశం నలుమూలల నుండి సుమారు 500 మంది ప్రతినిధులు పాల్గొన్నారు. ఎస్‌సీసీఎల్ 500 మెగావాట్లు అంతకంటే ఎక్కువ విద్యుత్ ప్లాంట్ల విభాగంలో ఈ అవార్డును పొందింది. ఎస్‌సీసీఎల్ చైర్మన్, మేనేజింగ్ డైరెక్టర్ ఎన్.శ్రీధర్ ఈ సంద‌ర్భంగా మాట్లాడుతూ.. ఎస్‌టీపీపీ అధికారులు, సిబ్బందికి అభినంద‌న‌లు తెలిపారు. ఇదే స్ఫూర్తితో పనిని కొనసాగించాలని కోరారు. అంతకుముందు ఈ ఏడాది ఏప్రిల్‌లో ఎస్‌టీపీపీకి జాతీయ స్థాయి ఉత్తమ ఫ్లై యాష్ వినియోగ అవార్డు లభించిన సంగ‌తి తెలిసిందే.