చెయ్యికి చేటు తెచ్చిన ఆర్‌ఎంపీ వైద్యం

ఆర్‌ఎంపీ చేసిన వచ్చిరాని వైద్యంతో ఓ వృద్ధురాలి చెయ్యిని తొలగించాల్సిన పరిస్థితి ఏర్పడింది. కుటుంబ సభ్యుల కథనం ప్రకారం.. హనుమకొండ జిల్లా ఐనవోలు మండల కేంద్రానికి చెందిన గందేపల్లి ఉప్పలమ్మకు నిరుడు పక్షవాతం రావడంతో కుడి చెయ్యి పని చేయకుండా పోయింది.

• పక్షవాతంతో పనిచేయని కుడి చెయ్యి..
• వైద్యం వికటించడంతో దెబ్బతిన్న ఎడమ చెయ్యి

ఐనవోలు, జూన్‌ 8 : ఆర్‌ఎంపీ చేసిన వచ్చిరాని వైద్యంతో ఓ వృద్ధురాలి చెయ్యిని తొలగించాల్సిన పరిస్థితి ఏర్పడింది. కుటుంబ సభ్యుల కథనం ప్రకారం.. హనుమకొండ జిల్లా ఐనవోలు మండల కేంద్రానికి చెందిన గందేపల్లి ఉప్పలమ్మకు నిరుడు పక్షవాతం రావడంతో కుడి చెయ్యి పని చేయకుండా పోయింది. గత నెల 30న ఉప్పలమ్మకు వాంతులు కాగా, 31న ఆర్‌ఎంపీతో వైద్యం చేయించారు. నీరసంగా ఉండటంతో ఆమెకు ఇంటి దగ్గరే ఎడమ చెయ్యికి స్లైన్‌ పెట్టాడు. రెండో రోజు చెయ్యి కొంచెం నల్లబడిందని కుటుంబ సభ్యులు ఆర్‌ఎంపీ దృష్టికి తీసుకెళ్లగా, మళ్లీ రెండు ఇంజెక్షన్లు వేశాడు. సమస్య తీవ్రం కాగా ఈ నెల 5న వరంగల్‌లోని దవాఖానకు తీసుకెళ్లారు. పరీక్షించిన వైద్యుడు నిమ్స్‌కు రెఫర్‌ చేయడంతో ఈ నెల 6న తీసుకెళ్లగా, పరీక్షించిన వైద్యులు చేతిని తొలగించాల్సి వస్తుందని చెప్పారు. గాంధీ, ఉస్మానియా లేదా వరంగల్‌ ఎంజీఎంలో చేర్పించాలని సూచించారు. దీంతో గురువారం ఎంజీఎం దవాఖానలో చేర్పించారు. శుక్రవారం ఉదయం ఉప్పలమ్మను పరీక్షించిన వైద్యులు చేతిని తొలగించాలని సూచించారు. గతంలో పక్షవాతం కారణంగా కుడి చేయి పనిచేయకుండా పోగా.. ఇప్పుడు ఆర్‌ఎంపీ వైద్యం వికటించి ఎడమ చేతిని కోల్పోవాల్సి వచ్చిందని కుటుంబసభ్యులు వాపోయారు.