Visit:
మంచిర్యాల, ఫిబ్రవరి 16 (నమస్తే తెలంగాణ ప్రతినిధి) : మంచిర్యాల జిల్లా క్యాతనపల్లి మున్సిపాలిటీ చైర్మన్, వైస్ చైర్మన్ ఎన్నిక జరుగకుండా కాంగ్రెస్ పార్టీ అరాచకాలకు తెరలేపింది. పోలీసులు, అధికారులను అడ్డం పెట్టుకొని పక్కా పథకం ప్రకారం చైర్మన్ ఎన్నికను మంగళవారానికి వాయిదా వేసింది. క్యాతనపల్లిలో 144వ సెక్షన్ అమల్లో ఉన్నదని చెప్పిన పోలీసులు, ఏకపక్షంగా అధికార పార్టీ నాయకులకు వత్తాసు పలికారు. వందలాది మంది కాంగ్రెస్ నాయకులతోపాటు స్థానికేతరులను క్యాతన్పల్లి మున్సిపాలిటీ సమీపంలోకి అనుమతించిన పోలీసులు.. బీఆర్ఎస్, సీపీఐ నుంచి గెలిచిన కౌన్సిలర్లు, నాయకులను మున్సిపాలిటీకి రాకుండా అడుగడుగునా అడ్డుకున్నారు.
క్యాతన్పల్లిలోని మాజీ ఎమ్మెల్యే బాల్కసుమన్ ఇంటి నుంచి ఉదయం 11.20 గంటలకు మున్సిపాలిటికీ బయల్దేరిన కౌన్సిలర్లను రామకృష్ణాపూర్ ైప్లెఓవర్ ముందే ఆపేశారు. దీంతో బాల్కసుమన్, స్థానిక నాయకులు రోడ్డుపై బైఠాయించి నిరసన వ్యక్తంచేశారు. దాదాపు అరగంట సమయం వృథా అయ్యాక వదిలారు. అనంతరం ఫ్లైఓవర్కు కింది భాగంలో మున్సిపాలిటీకి వెళ్లే మార్గంలో మరోసారి అడ్డుకున్నారు. కేవలం కౌన్సిలర్లు మాత్రమే వెళ్లాలని, మిగిలిన నాయకులు వెళ్లొదని ఆంక్షలు విధించారు.
లోపలున్న కాంగ్రెస్ నాయకులను బయటికి పంపిస్తే కౌన్సిలర్లు మాత్రమే వెళ్తారని, లేదంటే తామందరినీ అనుమతించాల్సిందేనని బీఆర్ఎస్, సీపీఐ నాయకులు డిమాండ్ చేశారు. ఇలా ఇక్కడ కాసేపు వాగ్వాదం జరిగేలోపు మధ్యాహ్నం 12 గంటలకు గెలిచిన కౌన్సిలర్లు ఎవ్వరూ రాలేదని, చైర్మన్, వైస్ చైర్మన్ ఎన్నికను మంగళవారం ఉదయం 11 గంటలకు వాయిదా వేస్తున్నట్టు ఎమ్మార్వో సతీశ్ ప్రకటించారు. దీంతో బీఆర్ఎస్, సీపీఐ కౌన్సిలర్లు మున్సిపాలిటీకి వెళ్లకుండానే వెనుతిరిగి వెళ్లిపోయారు. పక్కా పథకం ప్రకారం ఎలాగైనా ఎన్నికను వాయిదా వేయాలనే ఉద్దేశంతో పోలీసులు, అధికారులు వ్యవహరించిన తీరు విమర్శలకు తావిస్తున్నది.
పోలీసుల తీరుపై బాల్కసుమన్ మండిపడ్డారు. ప్రజాతీర్పును గౌరవించకుండా మంత్రి వివేక్ అప్రజాస్వామికంగా వ్యవహరిస్తున్నారని దుయ్యబట్టారు. గూండాయిజం, రౌడీ రాజకీయాలు చేస్తున్న మంత్రి వివేక్ ఆయన తండ్రి కాకా వెంకటస్వామి పరువు తీస్తున్నారని విమర్శించారు. తాము ప్రజా తీర్పునకు కట్టుబడి ఉన్నామని, వివేక్ సైతం కట్టుబడి ఉండాలని హితవు చెప్పారు. సమావేశంలో ఏఐటీయూసీ రాష్ట్ర అధ్యక్షుడు సీతారామయ్య, సీపీఐ రాష్ట్ర కార్యదర్శివర్గ సభ్యుడు కలవేని శంకర్, బీఆర్ఎస్, సీపీఐ కౌన్సిలర్లు పాల్గొన్నారు.
