హైదరాబాద్, మార్చి 7 (నమస్తే తెలంగాణ): తెలంగాణ ఆర్థికశాఖ ప్రత్యేక ప్రధాన కార్యదర్శి రామకృష్ణారావు అరుదైన రికార్డు సృష్టించారు. 10 బడ్జెట్లు ఆయన హయాంలోనే రూపుదిద్దుకోవడం గమనార్హం. సహజంగా ఒక శాఖలో అధికారులు 2, 3 ఏండ్లు పనిచేస్తేనే గొప్ప. ఆర్థికశాఖ అత్యంత క్లిష్టమైంది కూడా. ఒక్కసారి బడ్జెట్ రూపొందించడం, దానిని అమలు చేయడమే కష్టమని అధికారులు భావిస్తుంటారు. కానీ, ఏకంగా పదిసార్లు బడ్జెట్ రూపకల్పనలో ఆయన భాగస్వామి అయ్యారు. 2014 ఫిబ్రవరిలో ఆర్థికశాఖ ప్రత్యేక కార్యదర్శిగా వచ్చిన ఆయన గడిచిన 8 ఏండ్లలో 10 బడ్జెట్లలో భాగస్వామి అయ్యారు.