కడెం నీటికోసం రైతుల ఆందోళన

కడెం ప్రాజెక్ట్‌ ఎడమ కాలువ ద్వారా పంటలకు సాగు నీరివ్వాలని రైతులు డిమాండ్‌ చేశారు. ఈ మేరకు సోమవారం వారు మంచిర్యాల జిల్లా జన్నారం మండలం తపాలాపూర్‌లోని అటవీశాఖ చెక్‌పోస్ట్‌ వద్ద ప్రధాన రోడ్డుపై చింతగూడ సింగిల్‌ విడో వైస్‌ చైర్మన్‌ కమ్మల విజయధర్మ ఆధ్వర్యంలో రైతులు ధర్నా నిర్వహించారు.

• తపాలాపూర్‌లో రోడ్డుపై ధర్నా
• అన్నదాతలపై ఏసీపీ ఆగ్రహం
• నీళ్లిస్తామన్న ఇరిగేషన్‌ ఈఈ హామీతో ఆందోళన విరమణ

జన్నారం, నవంబర్‌ 9 : కడెం ప్రాజెక్ట్‌ ఎడమ కాలువ ద్వారా పంటలకు సాగు నీరివ్వాలని రైతులు డిమాండ్‌ చేశారు. ఈ మేరకు సోమవారం వారు మంచిర్యాల జిల్లా జన్నారం మండలం తపాలాపూర్‌లోని అటవీశాఖ చెక్‌పోస్ట్‌ వద్ద ప్రధాన రోడ్డుపై చింతగూడ సింగిల్‌ విడో వైస్‌ చైర్మన్‌ కమ్మల విజయధర్మ ఆధ్వర్యంలో రైతులు ధర్నా నిర్వహించారు. సుమారు మూడు గంటలపాటు బైఠాయించడంతో ఇరువైపులా మూడు కిలో మీటర్ల మేర వాహనాలు నిలిచిపోయాయి. విషయం తెలుసుకున్న ఎస్సై ఉదయ్‌కిరణ్‌ అక్కడికి చేరుకొని రైతులతో మాట్లాడినప్పటికీ వారు శాంతించలేదు. సాగునీరు విడుదల చేసే వరకు ఆందోళన విరమించేదిలేదని స్పష్టంచేశారు. ఎమ్మెల్యే బొజ్జు పటేల్‌కు వ్యతిరేకంగా నినాదాలు చేశారు.

కడెం ప్రాజెక్టులో పుష్కలంగా నీరున్నా కావాలనే సరఫరా నిలిపివేశారని, రాత్రివేళల్లో గోదావరి నీటిని వదలి హైదరాబాద్‌లోని ఫ్యాక్టరీలకు తరలిస్తున్నారని ఆరోపించారు. ఇక్కడ పంటలు ఎండిపోతుంటే ఎవరి మెప్పుకోసం ఇక్కడి నీటిని తరలించుకుపోతున్నారని మండిపడ్డారు. ‘మా నీరు మాకు ఇవ్వాలి.. పంటలు చేతికి వచ్చే వరకు సాగు నీరిచ్చి ఆదుకోవాలి’ అని డిమాండ్‌ చేశారు. మంచిర్యాల ఏసీపీ ప్రకాశ్‌ రైతులతో మాట్లాడినా ఫలితం లేకుండాపోయింది.దీంతో ఆయన ఆందోళన విరమించాలని హెచ్చరించడంతో ఉద్రిక్త పరిస్థితులు నెలకొన్నాయి. కడెం ఇరిగేషన్‌ ఈఈ ప్రవీణ్‌ ఏఈతో మాట్లాడి ఎడమ కాలువకు సాగునీరు విడుదల చేయాలని చెప్పడంతో, రైతులు శాంతించారు. ఈ ఆందోళనలో జల సాధన సమితి అధ్యక్షుడు నైనాల గోవర్ధన్‌, రైతు సంఘం అధ్యక్షుడు మిక్కిలినేని రాజశేఖర్‌, వైస్‌ ఎంపీపీ సుతారి వినయ్‌ తదితరులు పాల్గొన్నారు.