లష్కర్‌ పోస్టుల్లో ఇష్టారాజ్యం.. అడుగడుగునా కాంగ్రెస్‌ నేతల పైరవీలు

తెలంగాణ సాగునీటి పారుదలశాఖలో పైరవీలు రాజ్యమేలుతున్నాయి. నిబంధనలకు విరుద్ధంగా తమ అనుయాయులను, కాంగ్రెస్‌ కార్యకర్తలను లష్కర్లుగా నియమించాలంటూ పలువురు ప్రజాప్రతినిధులు ఒత్తిడి తీసుకొస్తున్నారని ఇంజినీర్లు ఆవేదన వ్యక్తం చేస్తున్నారు.

• ఇరిగేషన్‌ ఇంజినీర్లపై ప్రజాప్రతినిధుల ఒత్తిళ్లు
• తమ అనుయాయులనే నియమించాలంటూ హుకుం
• మార్గదర్శకాలకు విరుద్ధంగా వ్యవహారం
• దిక్కుతోచక నియామకాలను నిలిపివేస్తున్న ఇంజినీర్లు

హైదరాబాద్‌, నవంబర్‌ 30 (నమస్తే తెలంగాణ): తెలంగాణ సాగునీటి పారుదలశాఖలో పైరవీలు రాజ్యమేలుతున్నాయి. నిబంధనలకు విరుద్ధంగా తమ అనుయాయులను, కాంగ్రెస్‌ కార్యకర్తలను లష్కర్లుగా నియమించాలంటూ పలువురు ప్రజాప్రతినిధులు ఒత్తిడి తీసుకొస్తున్నారని ఇంజినీర్లు ఆవేదన వ్యక్తం చేస్తున్నారు. ప్రాజెక్టులు, కాలువలు, చెరువుల తూములకు అమర్చే గేట్లు, షట్టర్లు నీటివృథాను అరికట్టడంలో ముఖ్యపాత్ర పోషిస్తాయి. వాటిలో ఎలాంటి చిన్న లోపం తలెత్తినా ప్రాజెక్టు నుంచి నీరు లీకవుతుంది. రాష్ట్రంలో భారీ, మధ్యతరహా ప్రాజెక్టులకు 1,000 గేట్లు, కాలువలు, తూములకు సంబంధించి 15 వేలకుపైగా గేట్లు ఉంటాయని అంచనా. గత బీఆర్‌ఎస్‌ ప్రభుత్వమే కొత్తగా 4 వేల వరకు తూములను నిర్మించింది.

రాష్ట్రంలో మొత్తంగా 644 ఎత్తిపోతల స్కీమ్‌లు ఉన్నాయి. వాటన్నింటినీ ఎప్పటికప్పుడు పర్యవేక్షించేందుకు కట్టుదిట్టమైన వ్యవస్థ అవసరం. ఈ నేపథ్యంలో గత బీఆర్‌ఎస్‌ ప్రభుత్వం రెవెన్యూ శాఖలోని 5,073 మంది వీఆర్‌ఏలను లష్కర్లు, హెల్పర్లుగా నియమించింది. ఆ తర్వాత అధికారంలోకి వచ్చిన కాంగ్రెస్‌ ప్రభుత్వం అదనంగా ఔట్‌సోర్సింగ్‌ పద్ధతిలో మరో 2,494 మంది లష్కర్లు, 61 మంది హెల్పర్లను నియమించాలని నిర్ణయించింది. అందుకోసం ఈ ఏడాది జూలైలో జీవో 1212ను విడుదల చేసింది. లష్కర్లు, హెల్పర్లను థర్డ్‌పార్టీ ఏజెన్సీల ద్వారా మాత్రమే నియమించాలని స్పష్టం చేసింది. ఏజెన్సీలకు ఉండాల్సిన అర్హతలు, నియామకాల్లో పాటించాల్సిన మార్గదర్శకాలను జారీచేసింది. కానీ, క్షేత్రస్థాయిలో ఆ నిబంధనలను అడుగడుగునా తుంగలో తొక్కుతున్నారు.

కాంగ్రెస్‌ నేతల పైరవీ ఉంటేనే..

లష్కర్ల నియామకం కోసం టెరిటోరియల్‌ సీఈ చైర్మన్‌గా, డిప్యూటీ చీఫ్‌ ఇంజినీర్‌, సంబంధిత ఎస్‌ఈ సభ్యులుగా గతంలోనే స్క్రీనింగ్‌ కమిటీని నియమించారు. 45 ఏండ్లలోపు వయస్సు ఉండి చదవడం, రాయడం వచ్చిన, ఆ ప్రాజెక్టుల సమీప గ్రామాలకు చెందినవారిని లష్కర్లు, హెల్పర్లుగా ఎంపిక చేయాలని ప్రభుత్వం మార్గదర్శకాలు జారీచేసింది. కానీ, క్షేత్రస్థాయిలో ఎక్కడా ఆ నిబంధనలను పాటించడం లేదని ఇంజినీర్లు వాపోతున్నారు. స్థానిక కాంగ్రెస్‌ ప్రజాప్రతినిధులు, నాయకులు కింది నుంచి పైస్థాయి వరకు పైరవీలు చేస్తున్నారని మండిపడుతున్నారు. ఏజెన్సీ బాధ్యతలను అప్పగించాలని, లేదంటే ఏజెన్సీల ద్వారా కాంగ్రెస్‌ కార్యకర్తలు, ఆ పార్టీ నాయకుల అనుయాయులనే నియమించాలని ఒత్తిడి తీసుకొస్తున్నారని ఆవేదన వ్యక్తం చేస్తున్నారు.

ప్రధాన కాలువలు, స్లూయిస్‌లు ఉన్నచోట సమీప గ్రామాలకు చెందినవారినే లష్కర్లుగా నియమించాలని నిబంధనలు స్పష్టం చేస్తున్నా అందుకు విరుద్ధంగా నియామకాలు చేపట్టాలని బెదిరింపులకు దిగుతున్నారని, కొందరు కాంగ్రెస్‌ ఎమ్మెల్యేలు తమకు చెందినవారి పేర్లను నేరుగా పంపి వారినే నియమించాలని ఆదేశిస్తున్నారని, వారికి కొందరు మంత్రులు వత్తాసుపలుకుతున్నారని ధ్వజమెత్తుతున్నారు. ఈ ఒత్తిళ్లను తట్టుకోలేక, నిబంధనలకు విరుద్ధంగా వ్యవహరించలేక తమ పరిధిలో లష్కర్ల నియామకాన్నే పక్కనపెట్టినట్టు పలువురు ఇంజినీర్లు చెప్తున్నారు.

ఇష్టారీతిన ఏజెన్సీల ఎంపిక

ఏదైనా ప్రభుత్వ శాఖలో కాంట్రాక్ట్‌ పద్ధతిన ఉద్యోగ నియామకాలు చేపట్టే ఏజెన్సీకి 3 ఏండ్లలో రూ.30 లక్షల బ్యాంక్‌ టర్నోవర్‌ ఉండటంతోపాటు 6 నెలలు ఈపీఎఫ్‌, జీఎస్టీ, ఈఎస్‌ఐ చెల్లింపులు జరిపి ఉండాలి. ఈ నిబంధనలకు అనుబంధంగా లష్కర్‌ పోస్టుల భర్తీ విషయమై ఏజెన్సీలకు మరికొన్ని షరతులు విధించారు. ఇతర కాంట్రాక్ట్‌, ఔట్‌సోర్సింగ్‌, హానరోరియం, కార్యాచరణ సేవలు ఇరిగేషన్‌ శాఖలో ధ్రువీకరించాలి. నిర్దేశిత నిబంధనలను అనుసరించి ఔట్‌సోర్సింగ్‌ ఏజెన్సీతో కొత్త ఒప్పందాన్ని కుదుర్చుకోవాలి. కానీ, లష్కర్‌ నియామకాలకు సంబంధించి అలాంటివేమీ లేకుండానే రాజకీయ నేతల సిఫారసుతో ఏజెన్సీలను ఖరారు చేసినట్టు ఇరిగేషన్‌ వర్గాలు చెప్తున్నాయి. ముఖ్యంగా ఉమ్మడి నల్లగొండ, ఖమ్మం, మహబూబ్‌నగర్‌ జిల్లాలో ఈ పరిస్థితి నెలకొన్నట్టు తెలుస్తున్నది. నియామక అనుమతులు దక్కించుకున్న ఏజెన్సీలు లషర్‌ నియామకాలకు దరఖాస్తులు స్వీకరించి ఒకో పోస్ట్‌కు రూ.2-3 లక్షలు వసూలు చేస్తున్నట్టు విశ్వసనీయ సమాచారం.