బయోలాజికల్‌-ఈ నుంచి న్యుమోనియా టీకా

హైదరాబాద్‌కు చెందిన వ్యాక్సిన్‌ తయారీ సంస్థ బయోలాజికల్‌-ఈ మరో ఘనత సాధించింది.

• పీసీవీ-14 టీకా వినియోగానికి డీసీజీఐ అనుమతులు
• స్ట్రెప్టోకోకస్‌ వైరస్‌ నుంచి చిన్నారులకు సమర్థంగా రక్షణ

హైదరాబాద్‌, డిసెంబర్‌ 16 (నమస్తే తెలంగాణ): హైదరాబాద్‌కు చెందిన వ్యాక్సిన్‌ తయారీ సంస్థ బయోలాజికల్‌-ఈ మరో ఘనత సాధించింది. స్ట్రెప్టోకోకస్‌ న్యుమోనియా వైరస్‌ను ఎదుర్కొనేందుకు అభివృద్ధి చేసిన ‘14-వాలెంట్‌ పీడియాట్రిక్‌ న్యుమోకాకల్‌ కాంజుగేట్‌ వ్యాక్సిన్‌’ (పీసీవీ-14) వినియోగానికి డ్రగ్స్‌ కంట్రోలర్‌ జనరల్‌ ఆఫ్‌ ఇండియా (డీసీజీఐ) నుంచి అనుమతులు లభించినట్టు ఆ సంస్థ శుక్రవారం ప్రకటించింది. 6, 10, 14 వారాల వయసులో శిశువులకు ఈ టీకా ఇవ్వవచ్చని తెలిపింది. మన దేశంతోపాటు అభివృద్ధి చెందుతున్న దేశాల్లో ఐదేండ్లలోపు వయసున్న ఎంతో మంది పిల్లల మరణాలకు కారణమవుతున్న స్ట్రెప్టోకోకస్‌ న్యుమోనియాను నిరోధించేందుకు పీసీవీ-14 టీకా ఉపయోగపడుతుందని పేర్కొన్నది. 14 రకాల స్ట్రెప్టోకోకస్‌ వైరస్‌ వేరియంట్లను ఎదుర్కోగలదని, మన దేశంలో ఎక్కువగా వ్యాప్తి చెందుతున్న 22ఎఫ్‌, 33ఎఫ్‌ రకం స్ట్రెప్టోకోకస్‌ వైరస్‌ నుంచి సమర్థంగా రక్షణ కల్పిస్తుందని తెలిపింది. వ్యాక్సిన్‌కు అనుమతులు లభించడంపై బయోలాజికల్‌-ఈ ఎండీ మహిమా దాట్ల సంతోషం వ్యక్తం చేశారు. వ్యాక్సిన్‌ను ప్రపంచవ్యాప్తంగా అందుబాటులోకి తెస్తామని చెప్పారు.