మంత్రి జూపల్లిని విమర్శించారని..

సోషల్‌ మీడియాలో మంత్రి జూపల్లిని విమర్శించారని ఓ యువకుడిని కొల్లాపూర్‌ పోలీస్‌ స్టేషన్‌లో గురువారం ఉదయం 7 నుంచి, రాత్రి ఏడు గంటల దాకా చిత్రహింసలకు గురిచేసిన ఘటన చోటుచేసుకున్నది.

• యువకుడిని చితకబాదిన ఎస్సై

మహబూబ్‌నగర్‌, అక్టోబర్‌ 22 (నమస్తే తెలంగాణ ప్రతినిధి): సోషల్‌ మీడియాలో మంత్రి జూపల్లిని విమర్శించారని ఓ యువకుడిని కొల్లాపూర్‌ పోలీస్‌ స్టేషన్‌లో గురువారం ఉదయం 7 నుంచి, రాత్రి ఏడు గంటల దాకా చిత్రహింసలకు గురిచేసిన ఘటన చోటుచేసుకున్నది. బాధితుడి కథనం ప్రకారం.. నాగర్‌కర్నూల్‌ జిల్లా కొల్లాపూర్‌ మండలం రామాపురం గ్రామానికి చెందిన బీఆర్‌ఎస్‌ కార్యకర్త మండ్ల రాఘవ బుధవారం రాత్రి గ్రామానికి చెందిన సోషల్‌ మీడియా గ్రూపులో మంత్రి జూపల్లి కృష్ణారావును విమర్శించాడు అనే కారణంతో పోలీసులు స్టేషన్‌కు తీసుకెళ్లారు.

కాంగ్రెస్‌ పార్టీ నాయకులను విమర్శిస్తూ పోస్టులను పెడుతావా అంటూ చితకబాదారు. పోలీసుల దాడిలో రెండు చేతులు, అరికాళ్లలో రక్తం గడ్డకట్టి తీవ్ర నొప్పులతో బాధపడుతున్నట్టు బాధిత యువకుడు తెలిపారు. తప్పు చేసి ఉంటే కేసు పెట్టి కోర్టుకు పంపించాలి కానీ చట్టాన్ని చేతిలోకి తీసుకొని విచక్షణారహితంగా హింసించడం ఏమిటని.. ఇదేనా ఫ్రెండ్లీ పోలీస్‌ అంటే అని పలువురు ప్రశ్నిస్తున్నారు.