ఆంత్రాక్స్‌తో నొప్పి మాయం

ఆంత్రాక్స్‌… ఎంతటివారినైనా వణికించే బ్యాక్టీరియా. దీన్ని జీవాయుధంగా కూడా ప్రయోగించేవారు. అలాంటి ఆంత్రాక్స్‌ వల్ల ప్రయోజనం కూడా ఉందంటే నమ్మగలమా! హార్వర్డ్‌ మెడికల్‌ స్కూల్‌ శాస్త్రవేత్తల పరిశోధనల గురించి తెలిస్తే నమ్మక తప్పదనిపిస్తుంది. సాధారణంగా హానికారక బ్యాక్టీరియా మీద ప్రయోగాలు చేసేటప్పుడు, అది ఎలా పనిచేస్తుంది, దాన్ని ఎలా నిరోధించాలి… అన్న ప్రశ్నలే లక్ష్యంగా ఉంటాయి. కానీ ఈ పరిశోధనలో ఆంత్రాక్స్‌ రసాయనాలు మనకు నొప్పి కలిగించే కణాల మీద ఎలాంటి ప్రభావం చూపుతాయో తెలుసుకునే ప్రయత్నం చేశారు. ఆంత్రాక్స్‌ చాలా సులువుగా జంతువులకు అంటుకుంటుంది కాబట్టి, ఎలుకల మీద ఈ ప్రయోగం చేశారు. ఆశ్చర్యకరంగా, అవి నొప్పిని నిలువరిస్తున్నట్టు తేలింది. ప్రస్తుతానికి నొప్పిని తగ్గించేందుకు పెయిన్‌ కిల్లర్స్‌ లేదా ఓపియాడ్స్‌ వాడుతున్నారు. పెయిన్‌ కిల్లర్స్‌ దుష్ఫలితాలు అందించగా, ఓపియాడ్స్‌ ఓ వ్యసనంగా మారతాయి. అందుకు విరుద్ధంగా ఆంత్రాక్స్‌లో భాగమైన కొన్ని రసాయనాలు.. వెన్నెముక ద్వారా నొప్పిని తెలియచేసే నాడీవ్యవస్థను అదుపుచేసినట్టు తేలింది.