నీలా బతికే.. బలమివ్వు!

వ్యక్తిత్వ వికాస పుస్తకాలతో పన్లేదు.
కౌన్సెలర్ల అపాయింట్‌మెంట్‌ అవసరం లేదు.
ఆధునిక గురు పరంపర చుట్టూ ప్రదక్షిణల ప్రయాసే వద్దు.
పీవీ జీవితం ఒక్కటి చాలు. ఆయనెలా జీవించారో
తెలుసుకోగలిగితే.. పరిపూర్ణంగా బతికేయవచ్చు.

వంగరలోని చెక్క కుర్చీ, పీఎంవోలోని ప్రధాని పీఠం..
రెండూ ఒకటే ఆయనకు.
తెలంగాణ మాండలికాన్ని ఎంతగా ప్రేమించారో,
కీట్స్‌ కవిత్వాన్నీ అంతే ఇష్టపడ్డారు.

పదవి వచ్చిననాడు పొంగి పోలేదు.
పీఠం దిగిననాడు కుంగి పోలేదు.

విశ్వభాషలు తెలిసిన మౌని.
ప్రపంచం పోకడ ఎరిగిన జ్ఞాని.

తామరాకుమీద నీటిబిందువు.
బిందువులా కనిపించే అపార సింధువు.

పుస్తక ప్రియుడు. నడిచే గ్రంథాలయం.
అంతర్ముఖుడు. బహుముఖ ప్రజ్ఞావంతుడు.
రచయిత. తానే ఓ గెలుపు కథ.

‘ఓ కర్మయోగీ..
ఆర్థిక సంస్కరణలతో ఉద్యోగాలు..
గ్లోబలైజేషన్‌తో సాంకేతికత..
అందించిన ఆ చేతులతోనే
నీలోని నిరాడంబరత..
నీదైన నిశ్చలతత్వం..
మాకూ ప్రసాదించు!
నీలా బతికే బలమివ్వు
మళ్లీ పుడతానన్న అభయమివ్వు!’