Inspiration | డిగ్రీ పట్టా కూడా లేదు.. కానీ ఆమె వాదిస్తే న్యాయవాదులు నీళ్లు నమలాల్సిందే

Inspiration | సత్వీందర్‌ కౌర్‌.. ‘అబాండెన్డ్‌ బ్రైడ్స్‌ బై ఎన్‌ఆర్‌ఐ హజ్బెండ్స్‌ ఇంటర్నేషనల్లీ’ వెల్ఫేర్‌ సొసైటీ వ్యవస్థాపకురాలు. ఇతర ప్రాంతాలతో పోలిస్తే పంజాబ్‌లో ఎన్‌ఆర్‌ఐ పెండ్లికొడుకుల అరాచకాలు ఎక్కువ. ఎక్కడి నుంచో ఊడిపడతారు. గొప్పలు చెప్పుకొంటారు.

Inspiration | సత్వీందర్‌ కౌర్‌.. ‘అబాండెన్డ్‌ బ్రైడ్స్‌ బై ఎన్‌ఆర్‌ఐ హజ్బెండ్స్‌ ఇంటర్నేషనల్లీ’ వెల్ఫేర్‌ సొసైటీ వ్యవస్థాపకురాలు. ఇతర ప్రాంతాలతో పోలిస్తే పంజాబ్‌లో ఎన్‌ఆర్‌ఐ పెండ్లికొడుకుల అరాచకాలు ఎక్కువ. ఎక్కడి నుంచో ఊడిపడతారు. గొప్పలు చెప్పుకొంటారు. అమాయకులైన ఆడపిల్లలను కట్టుకుని వెళ్లిపోతారు. లేదంటే మోజు తీర్చుకుని మాయమైపోతారు. లూధియానాకు చెందిన సత్వీందర్‌ కౌర్‌ కూడా అలా మోసపోయిన అమ్మాయే.

ఉక్రెయిన్‌లో ఉద్యోగం చేస్తున్నానంటూ ఓ ప్రబుద్ధుడు ఆమె తల్లిదండ్రులకు మాయమాటలు చెప్పాడు. కొంతకాలం కాపురం చేసి .. తిరిగొస్తానంటూ వెళ్లిపోయాడు. ఐదేండ్ల తర్వాత కానీ అతని అసలు స్వరూపం తెలియలేదు. పోలీసుల చుట్టూ, ఉమెన్స్‌ సెల్‌ చుట్టూ తిరిగినా ఫలితం లేకపోయింది. ఆ చేదు అనుభవమే ఆమెను ఉద్యమకారిణిగా మార్చింది. కౌర్‌ ఇప్పటి వరకూ ఏడొందల మంది మహిళలకు అండగా నిలిచారు. విడాకులు, నష్టపరిహారం ఇప్పించారు. జీవనభృతి అందేలా కృషి చేశారు. ‘ఇలాంటి మోసాలు దేశవ్యాప్తంగా అనేకం జరుగుతున్నాయి.

మహిళల అమాయకత్వమే ఆ మేకవన్నె పులులకు బలాన్ని ఇస్తున్నది. కన్నవాళ్లు కూడా విదేశీ సంబంధం అనగానే.. కళ్లు మూసుకుని ఖాయం చేసుకోవడం మానేయాలి’ అని సలహా ఇస్తారు కౌర్‌. పట్టభద్రురాలు కూడా కాని ఆ మహిళ ఇప్పుడు, చకచకా చట్టాలు వల్లెవేస్తారు. న్యాయవాదులు సైతం నీళ్లు నమిలేలా వాదిస్తారు.