Cricket Records | ప్రపంచకప్లో అత్యధిక పరుగుల రికార్డు బద్దలై ఒక్క రోజు కూడా కాకముందే.. లిస్ట్-‘ఎ’ క్రికెట్లో పెను విధ్వంసం నమోదైంది. దక్షిణాఫ్రికా దేశవాళీ టోర్నీ ‘ది మార్ష్ కప్’లో భాగంగా 21 ఏండ్ల కుర్రాడు ఫ్రెజర్ మెక్గుర్క్ అరుదైన రికార్డు నమోదు చేసుకున్నాడు. కేవలం 29 బంతుల్లోనే సెంచరీ చేసి లిస్ట్-‘ఎ’ క్రికెట్లో ఫాస్టెస్ట్ సెంచరీ తన పేరిట లిఖించుకున్నాడు. దక్షిణాఫ్రికా మాజీ ఆటగాడు ఏబీ డివిలియర్స్ పేరిట ఉన్న రికార్డును ఫ్రెజర్ తిరగరాశాడు. అయితే డివిలియర్స్ అంతర్జాతీయ స్థాయిలో వెస్టిండీస్పై (2015లో) 31 బంతుల్లో సెంచరీ చేసిన విషయం తెలిసిందే. అంతర్జాతీయ పోటీల్లో ఇదే ఫాస్టెస్ట్ కాగా.. లిస్ట్-‘ఎ’లో ఫ్రెజర్ నయా రికార్డు నెలకొల్పాడు.
టాస్మానియాతో జరిగిన పోరులో సౌత్ ఆస్ట్రేలియా తరఫున బరిలోకి దిగిన ఫ్రెజర్.. తొలుత 18 బంతుల్లో హాఫ్ సెంచరీ పూర్తి చేసుకున్నాడు. ఆ తర్వాత మరింత చెలరేగిన ఈ కుర్రాడు.. మరో 11 బంతుల్లోనే మూడంకెల స్కోరు తన పేరిట లిఖించుకున్నాడు. చివరికి అతడు 38 బంతుల్లో 125 పరుగులు చేసి ఔటయ్యాడు. ఇక మ్యాచ్ విషయానికి వస్తే తొలుత బ్యాటింగ్ చేసిన టాస్మానియా నిర్ణీత 50 ఓవర్లలో 9 వికెట్ల నష్టానికి 435 పరుగులు చేసింది. జోర్డాన్ స్కిల్ (116) సెంచరీతో చెలరేగగా.. జెవెల్ (90), రైట్ (51) హాఫ్ సెంచరీలు చేశారు. అనంతరం లక్ష్యఛేదనలో ప్రెజర్ (38 బంతుల్లో 125; 10 ఫోర్లు, 13 సిక్సర్లు) దంచికొట్టినా.. దక్షిణ ఆస్ట్రేలియా చివరకు 46.4 ఓవర్లలో 398 పరుగులకు ఆలౌటైంది. ఫలితంగా టాస్మానియా 37 పరుగుల తేడాతో విజయం సాధించింది.