Visit:
IND vs ENG : వన్డే సిరీస్ తొలి మ్యాచ్లో భారత పేసర్ల ధాటికి ఇంగ్లండ్ టాపార్డర్ కుప్పకూలినా మిడిలార్డర్ నిలబడింది. ఎడ్జ్బాస్టన్లో గుర్నూర్ బ్రార్(2-61), ప్రసిధ్ కృష్ణ(2-50)లు ఒకే ఓవర్లో రెండేసి వికెట్లతో రెచ్చిపోగా.. 80 పరుగులకే సగం వికెట్లు కోల్పోయిన ఆతిథ్య జట్టు అనూహ్యంగా పుంజుకుంది. టెస్టుల్లోనే కాదు వన్డేల్లోనూ రాణించగలనని చాటుతూ జో రూట్(76 నాటౌట్) అర్ధ శతకంతో మెరిశాడు. లియాం డాసన్(68)తో కలిసి ఏడో వికెట్కు శతక భాగస్వామ్యం నెలకొల్పి పరువు కాపాడాడు. ఆఖర్లో అక్షర్ పటేల్(4-62) తిప్పేయగా ఇంగ్లండ్ 258కే కుప్పకూలింది.
ఎడ్జ్బాస్టన్లో జరుగుతున్న తొలి వన్డేల్లో ఇంగ్లండ్ తడబడినా సవాల్ విసిరేంత స్కోర్ చేసింది. పవర్ ప్లేలో అజేయంగా 51 రన్స్ చేసిన ఆతిథ్య జట్టుకు ఆ తర్వాత వరసగా వికెట్లు కోల్పోయింది. గుర్నూర్ బ్రార్(2-61) విజృంభణతో ఒకే ఓవర్లో జాకబ్ బెథెల్(14), బెన్ డకెట్(43) ఔటయ్యారు. రెండో బంతికి బెథెల్ వెనుదిరగగా.. నాలుగో బంతికి థర్డ్మ్యాన్ దిశగా డకెట్ సిక్సర్కు యత్నించగా.. బౌండరీ లైన్ వద్ద బుమ్రా ఒడుపుగా అందుకున్నాడు. దాంతో, 63 పరుగుల వద్ద ఆతిథ్య జట్టు రెండో వికెట్ కోల్పోయింది.
Convincing way to wrap the England innings 👏
Axar Patel registers his best figures in ODIs with 4⃣/6⃣2⃣ ✨
Updates ▶️ https://t.co/2sg194tpxH #TeamIndia | #ENGvIND | @akshar2026 pic.twitter.com/s1GVfIJTFj
— BCCI (@BCCI) July 14, 2026
ఆ తర్వాతి బుమ్రా ఓవర్లో కెప్టెన్ హ్యారీ బ్రూక్(1) స్లిప్లో రోహిత్ శర్మ చేతికి చిక్కాడు. టాపార్డర్ విఫలమైన వేళ జట్టును ఆదుకోవాలనుకున్న జోస్ బట్లర్(5)ను, సామ్ కరన్(0)ను ప్రసిధ్ కృష్ణ(2-50) వెనక్కి పంపాడు. అంతే.. ఇంగ్లండ్ కష్టాలు మరింత పెరిగాయి.
గుర్నూర్, ప్రసిధ్ల జోరుతో 80 పరుగులకే సగం వికెట్లు కోల్పోయిన ఆతిథ్య జట్టు.. 150, 180 కొడితే మహా గొప్ప అనిపించింది. కానీ, జో రూట్(76 నాటౌట్) ఆపద్భాందవుడి పాత్ర పోషిస్తూ భారత బౌలర్లను విసిగించాడు. ఏడు పరుగుల వద్ద దూబే రిటర్న్ క్యాచ్ జారవిడవడంతో బతికిపోయిన రూట్.. ఆల్రౌండర్ లియాం డాసన్(68)తో కలిసి స్కోర్ బోర్డును నడిపించాడు.
When England need someone to step up, isn’t it always Joe Root? 🌟 pic.twitter.com/8HRynfcwdI
— Cricinfo (@cricinfo) July 14, 2026
కాస్త కుదురుకున్నాక ఇద్దరూ బ్యాట్లకు పని చెప్పారు శతక భాగస్వామ్యం నెలకొల్పిన ఈ ద్వయాన్ని విడదీసి అక్షర్ పటేల్(4-62) ఊరటనిచ్చాడు. డాసన్తో పాటు టెయిలెండర్లను డగౌట్ చేర్చిన అక్షర్.. ఇంగ్లండ్ను 258 పరుగులకే కట్టడి చేయడంలో కీలకమయ్యాడు.
