Prithvi Shaw : ఢిల్లీ క్యాపిటల్స్ ఓపెనర్ పృథ్వీ షా(Prithvi Shaw)కు చిక్కులు తప్పేలా లేవు. నిరుడు ఒక పబ్లో జరిగిన గొడవ కేసులో ఈ చిచ్చరపిడుగు జైలుకు వెళ్లే చాన్స్ ఉంది. సోషల్ మీడియా ఇన్ఫ్లుయెన్సర్ సప్న గిల్(Sapna Gill) తనను షా వేధించాడంటూ కేసు పెట్టిన విషయం తెలిసిందే. ఈ కేసును తాజాగా ముంబై కోర్టు తిరగదోడింది.
షా, సప్న గిల్ కేసుకు సంబంధించిన విచారణ నివేదికను సమర్పించాలని మెట్రోపాలిటన్ మెజిస్ట్రేట్ ఎస్సీ తైడే (SC Tayde) గురువారం పోలీసులను ఆదేశించాడు. జూన్ 19వ తేదీ కల్లా రిపోర్టును తమ ముందు ఉంచాలని చెప్పాడు. దాంతో, షా జైలుకు వెళ్లే అవకాశం ఉందనే వార్తలు వినిపిస్తున్నాయి.
2023లో ఆంధేరి బార్లో పృథ్వీ షా, అతడి స్నేహితుడు అశిష్ యాదవ్లు తమతో గొడవ పడ్డారని.. ఇద్దరూ తమపై బేస్బాల్ బ్యాటుతో దాడి చేశారని సప్న గిల్ పోలీసులకు ఫిర్యాదు చేసింది. అతడిపై ఎఫ్ఐఆర్ నమోదు చేయాలని కోరింది. కానీ, పోలీసులు పట్టించుకోలేదు. అయితే.. సప్న అనవసర రాద్ధాంతం చేస్తుందని, తనను కావాలనే ఇరికిస్తోందని షా సైతం ఆమెపై కంప్లైంట్ చేశాడు. దాంతో, సప్న ముంబై కోర్టును ఆశ్రయించింది.
సప్న గిల్, పృథ్వీ షా
టీమిండియాకు ఆడాల్సిన షా 16వ సీజన్లో అట్టర్ ఫ్లాప్ అయ్యాడు. పేలవ ఫామ్తో వెస్టిండీస్ పర్యటనకు దూరమయ్యాడు. అనంతరం ఇంగ్లండ్లో జరిగిన వన్డే కప్లో అతడు పరుగుల వరద పారించాడు. దాంతో, మళ్లీ ముంబై రంజీ జట్టులో చోటు దక్కించుకున్నాడు. 17వ సీజన్లో రెండు మ్యాచ్లకు బెంచ్కే పరిమితమైన షా అవకాశం వచ్చిన తొలి మ్యాచ్లోనే హాఫ్ సెంచరీతో చెలరేగిన ఈ డాషింగ్ బ్యాటర్.. కోల్కతా నైట్ రైడర్స్తో జరిగిన రెండో మ్యాచ్లో 10 పరుగులతో నిరాశ పరిచాడు.