Ashes Series : ఇంగ్లండ్(England) జట్టు ఎట్టకేలకు యాషెస్(Ashes Series)లో బోణీ కొట్టింది. రెండో టెస్టులో చివరి దాకా పోరాడి భంగపడిని ఆతిథ్య జట్టు ఈసారి విజయాన్ని ఒడిసి పట్టుకుంది. ఉత్కంఠ రేపిన మూడో టెస్టు(Third Test)లో 3 వికెట్ల తేడాతో ఆస్ట్రేలియా(Australia)పై అద్భుత విజయం సాధించింది. యువ ఆటగాడు హ్యారీ బ్రూక్(75) చిరస్మరణీయ ఇన్నింగ్స్తో జట్టును ఆదుకున్నాడు.
బ్రూక్ ఔటయ్యాక క్రిస్ వోక్స్(32 నాటౌట్), మార్క్ వుడ్(16 నాటౌట్), మరో వికెట్ పడకుండా ఆడి జట్టును గెలిపించారు. దాంతో, ఇంగ్లండ్ 1-2తో సిరీస్లో నిలిచింది. బౌలింగ్తో పాటు బ్యాటింగ్లో సత్తా చాటిన మార్క్ వుడ్ ‘ప్లేయర్ ఆఫ్ ది మ్యాచ్’గా ఎంపికయ్యాడు. ఈ విజయంతో ఆస్ట్రేలియా చేతిలో వరుసగా 7 ఓటములకు ఇంగ్లండ్ ముగింపు పలికింది.
ఇంగ్లండ్ విధ్వంసక ఆటగాడు హ్యారీ బ్రూక్(Harry Brook) మూడో టెస్టులో సాధికారిక ఇన్నింగ్స్తో ఆకట్టుకున్నాడు. 251 లక్ష్య ఛేదనలో నాలుగో రోజు తొలి సెషన్లోనే ఇంగ్లండ్ 4 వికెట్లు కోల్పోయింది. అయితే.. క్రీజులో పాతుకుపోయిన బ్రూక్.. జో రూట్(21), బెన్ స్టోక్స్(13), జానీ బెయిర్ స్టో(5)తో కలిసి కీలక భాగస్వామ్యాలు నెలకొల్పాడు. ఒత్తిడిలోనూ బౌండరీలతో చెలరేగుతూ అర్ధ సెంచరీ సాధించాడు.
హ్యారీ బ్రూక్(75)
ఈ మ్యాచ్తో 24 ఏళ్ల బ్రూక్ టెస్టుల్లో సంచలనం సృష్టించాడు. ఈ ఫార్మాట్లో తక్కువ బంతుల్లో వేగంగా వెయ్యి పరుగులు చేసిన క్రికెటర్గా రికార్డుల్లోకి ఎక్కాడు. బ్రూక్ 1058 బంతుల్లోనే ఈ ఘనత సొంతం చేసుకోవడం విశేషం. పదో టెస్టు ఆడుతున్న బ్రూక్ 16వ ఇన్నింగ్స్లో 1000 పరుగుల మైలురాయికి చేరుకున్నాడు. అయితే.. మ్యాచ్ల పరంగా చూస్తే ఆస్ట్రేలియా దిగ్గజం డాన్ బ్రాడ్మన్(Don Bradman) వేగంగా వెయ్యి పరుగులు బాదాడు. అతను 7 టెస్టుల్లోనే వెయ్యి క్లబ్లో చేరాడు.