IPL 2023: ఐపీఎల్లో ఢిల్లీ తన సొంత మైదానమైన అరుణ్ జైట్లీ స్టేడియంలో పంజాబ్ కింగ్స్తో తలపడనుంది. ఇప్పటికే ప్లేఆఫ్స్ అవకాశాలను సంక్లిష్టం చేసుకున్న ఢిల్లీ ఈ మ్యాచ్లో ఓడిపోతే లీగ్ నుంచి అధికారికంగా ఎలిమినేట్ అయిన మొదటి టీం ఢిల్లీ అవుతుంది. మరోవైపు పంజాబ్ ప్రస్థానం పడుతూ లేస్తూ సాగుతోంది. గత రెండు మ్యాచుల్లో ఓడిపోవడంతో ఈ రోజు మ్యాచ్లో తప్పక గెలవాల్సిన పరిస్థితి తలెత్తింది.
అరుణ్ జైట్లీ స్టేడియం స్పిన్నర్లకు సహకరించే అవకాశం ఉంది. అంతేకాకుండా మ్యాచ్ రెండో ఇన్నింగ్స్లో మంచు ప్రభావం చూపించే అవకాశం ఉంది. కాబట్టి టాస్ గెలిచిన టీం బౌలింగ్ తీసుకునే అవకాశం ఉంది. 2020 నుంచి ఈ రెండు జట్లు 6సార్లు తలపడగా ఢిల్లీ 5 సార్లు గెలిచింది. పంజాబ్ బ్యాటర్లు ఫామ్లో ఉండటం వారికి కలిసొచ్చే అంశం.
పంజాబ్ బ్యాటర్ లివింగ్స్టోన్ అద్భుత ఫామ్లో ఉన్నాడు. మ్యాచ్ను ఒంటిచేత్తో తిప్పేయగల సత్తా అతడి సొంతం. అయితే అతడికి ఢిల్లీ స్పిన్నర్ల నుంచి ముప్పు పొంచి ఉంది. మరోవైపు అక్షర్ అటు బౌలింగ్, ఇటు బ్యాటింగ్లో రాణిస్తున్నాడు. ఫామ్ అందుకున్న వార్నర్ను అడ్డుకోవాలంటే పంజాబ్ బౌలర్లు కష్టపడాల్సిందే. అర్షదీప్ సింగ్, రాహుల్ చాహర్ ఇప్పటివరకు ఒక్కసారి కూడా అతడిని ఔట్ చేయలేకపోయారు. అంతేకాకుండా వార్నర్కు రబాడా బౌలింగ్లో మంచి రికార్డు ఉంది. 2015 నుంచి 2020వరకు డేవిడ్ వార్నర్ పంజాబ్పై వరసగా 9సార్లు 50కిపైగా రన్స్ చేశాడు.