ChatGPT | చాట్ జీపీటీ నుంచి కొత్త అప్‌డేట్‌.. టెక్ట్స్ నుంచి వీడియోల సృష్టి!

ChatGPT | చాట్‌జీపీటీలో స‌రికొత్త ఫీచ‌ర్ యూజ‌ర్ల‌కు అందుబాటులోకి రానున్న‌ది. టెక్ట్స్‌ను వీడియోలు, ఇమేజ్‌లుగా మార్చే జీపీటీ-4 త్వ‌ర‌లోనే యూజ‌ర్ల ద‌రిచేర‌నున్న‌దని మైక్రోసాఫ్ట్ జ‌ర్మ‌నీ చీఫ్ టెక్నాల‌జీ ఆఫీస‌ర్ అండ్రియాస్ బ్రౌన్ తెలిపారు.

ChatGPT |చాట్ జీపీటీలో యూజ‌ర్ల‌కు కొత్త ఫీచ‌ర్ అందుబాటులోకి రాబోతున్న‌ది. ఇప్ప‌టికే చాట్‌జీపీటీ చాట్‌బోట్ ద్వారా డేటా త‌యారీ, చాటింగ్ వంటివి వ‌చ్చాయి. తాజాగా టెక్ట్స్ నుంచి వీడియోలు, ఇమేజ్‌లను ఆవిష్క‌రించే ఫీచ‌ర్ త్వ‌ర‌లో అందుబాటులోకి రానున్న‌ది. ఈ సంగ‌తి మైక్రోసాఫ్ట్ జ‌ర్మ‌నీ చీఫ్ టెక్నాల‌జీ ఆఫీస‌ర్ అండ్రియాస్ బ్రౌన్ తెలిపారు. కొత్త‌గా డెవ‌ల‌ప్ చేసిన ఫీచ‌ర్‌కు జీపీటీ-4 అని పేరు పెట్టారు. ఈ నెల నాలుగో తేదీన జ‌రిగిన `ఏఐ ఇన్ ఫోక‌స్‌-డిజిట‌ల్ కిక్ అప్‌` అనే కార్య‌క్ర‌మంలో ఈ అప్‌డేట్‌ను మైక్రోసాఫ్ట్ జ‌ర్మ‌నీ చీఫ్‌టెక్నాల‌జీ ఆఫీస‌ర్ అండ్రియాస్ బ్రౌన్ వెల్ల‌డించారు.

ఇప్ప‌టి వ‌ర‌కు ఆర్టిఫిషియ‌ల్ ఇంటెలిజెన్స్ (ఏఐ) ఆధారిత రోబో ల‌వ్ లెట‌ర్లు రాయ‌డం.. క‌విత‌లు రాయ‌డం చేస్తున్న‌ది. ఈ-మెయిల్స్ కూడా పంపుతున్న‌ది. జోకులు కూడా పేలుస్తున్న‌ది. ఇవి ఏఐ బేసిక్ శ‌క్తి సామ‌ర్థ్యాలు.. కానీ చాట్ జీపీటీ చాట్‌బోట్ ఎంట్రీతో ఏఐ టూల్ శ‌క్తి సామ‌ర్థ్యాలు మ‌రింత పెరిగాయి. కొత్త‌గా టెక్ట్స్‌ను వీడియోగా మార్చేస్తుంది చాట్ జీపీటీ. `టెక్స్ట్ టు వీడియో`ఫీచ‌ర్ వ‌చ్చేవారం ఆవిష్క‌రిస్తారు. జీపీటీ-3.5కి అప్‌డేటెడ్ వ‌ర్ష‌న్ జీపీటీ-4 వ‌ర్ష‌న్ మ‌రింత శ‌క్తిమంతం, బ‌హుముఖ ప్ర‌జ్ఞాశాలిగా నిలుస్తుంద‌ని టెక్ వెబ్‌సైట్ స్ట‌ఫ్ పేర్కొంది.

పాపుల‌ర్ చాట్‌జీపీటీ చాట్‌బోట్ సృష్టించిన స్టార్ట‌ప్ కంపెనీ ఓపెన్ఏఐలో అతిపెద్ద ఇన్వెస్ట‌ర్ మైక్రోసాఫ్ట్ అన్న సంగ‌తి తెలిసిందే. తాజాగా వ‌చ్చిన స‌మాచారం ప్ర‌కారం అప్‌డేట్ జీపీటీ-4.. మ‌ల్టీ మోడ‌ల్‌గా ఉంటుంద‌ని భావిస్తున్నారు. జీపీటీ-4లో టెక్ట్స్‌తోపాటు ఇమేజ్‌లు, వీడియోల త‌యారీకి సంబంధించిన శ‌క్తి సామ‌ర్థ్యాల‌ను వెల్ల‌డిస్తామ‌ని అండ్రియాస్ బ్రౌన్ తెలిపారు. మ‌ల్టీ మోడ‌ల్ శ‌క్తి సామ‌ర్థ్యాల కింద చాట్ బేస్డ్ ఏఐ.. టెక్ట్స్‌ను ఇమేజ్‌లుగా, సౌండ్‌తో కూడిన వీడియోలుగా మార్చేస్తుంది.

ప్ర‌స్తుత చాట్ జీపీటీ-3, జీపీటీ-3.5 వ‌ర్ష‌న్ల‌లో చాట్‌బోట్ నుంచి టెక్ట్స్ ఔట్‌పుట్ వ‌స్తుంది. గూగుల్‌, మెటా వంటి టెక్ జెయింట్స్ ఇప్ప‌టికే త‌మ యూజ‌ర్ల‌కు స‌ర్వీస్‌తో కూడిన ఆఫ‌ర్లు ప్ర‌క‌టించాయి. ఫేస్‌బుక్ పేరెంట్ సంస్థ మెటా.. `మేక్‌-ఏ-వీడియో`, గూగుల్.. టెక్ట్స్ టు ఇమేజ్ జ‌న‌రేట‌ర్ `ఇమేజెన్ వీడియో`ను ఆవిష్క‌రించ‌నున్నాయి. మెటా, గూగుల్ స‌ర్వీసు ఇంకా ప‌రిశోధ‌న స్థాయిలోనే ఉంది. జ‌న‌రేటివ్ ఏఐ స్పేస్‌లో ఇత‌ర టెక్ జెయింట్స్ కంటే ఓపెన్ ఏఐ ఓ అడుగు ముందుకేస్తున్న‌ది.