నేడు ప్రపంచ జల దినోత్సవం
ఎర్రటి ఎండల్లో నెర్రెలు బారిన
నేలల్లో వలసల్లా సాగుతోన్న దాహం!
నెత్తిన ఖాళీ బిందెలతో దూరాలు
తగ్గించేసినా చెమటల్లో తప్ప నీటిని
నిజంగా చూడలేని నిస్సహాయత
ఒక్క చెలమ చెలిమి లేని ఒంటరి
ఇసుక దారుల్లో కన్నీటి పొరల్లోంచే
కానరాని నీటి జాడ కోసం అన్వేషణ!
చేతులు కాలాక ఆకులు పట్టుకున్నట్టు..
అమృతదారల్లాంటి వర్షపు నీళ్లు
నేలపాలైన గాజు ప్రతిమలా వెక్కిరిస్తుంటే
ఆ ముత్యపు బిందువుల్ని గుదిగుచ్చి
భద్రంగా దాచుకొలేని నిర్లక్ష్య ఫలమిది
నదుల ఊపిరి తీసేలా ప్రవాహ దారుల్ని
కాచి రిసార్టుల్ని గుండెలపై అదిమేసి
నదీమ తల్లిని ఎముకల గూడు చేసి
అడవుల్లో ఆటవిక రాజ్యం స్థాపించి
పచ్చదనాన్ని నల్లధనంగా మార్చేసి
నేలతల్లి గుండెల్లోకి ఎండిన బోర్లేసి
భూగర్భజలాలకు గర్భశోకం తెచ్చిపెట్టి
అవినీతి సంపాదనకే పథకాలు తప్ప
సాగునీటికి తాగునీటికి ప్రణాళికలు
లేని దూరదృష్టిరాహిత్యపు దురదృష్టాల్ని
వెంటేసుకొని ఎండిన బావుల చుట్టూ
ఆవురావురుమని మూగే కాకులమయ్యాం!
ఖాళీ బిందెలు బీళ్లు పడిన నేలలు
ఎండిన గొంతుకలతో పాడిపంటలు కరవై
ఎడారి కష్టాలై తడారిన బతుకులయ్యాయి
పరిసరాలు ఎండి గుండె తడి ఆవిరయ్యాక
ఇకనైనా మనం కళ్లు తెరవాలి తప్పదు!
ప్రతి నీటి బిందువు సాక్షాత్తూ అమృత
బిందువేనని గుర్తించి నీటిని పూజించాలి!
భీమవరపు పురుషోత్తమ్
99498 00253