న్యూస్ చానెల్‌లో వెద‌ర్ రిపోర్ట్ చ‌దువుతుండ‌గా స్క్రీన్‌పై అశ్లీల‌ వీడియో ప్ర‌త్య‌క్షం!

వాషింగ్ట‌న్ : జ‌న‌స‌మ్మ‌ర్ధ ప్ర‌దేశాల్లో భారీ తెర‌ల‌పై అశ్లీల వీడియోలు ప్ర‌త్య‌క్ష‌మ‌వుతున్న ఉదంతాలు వెల్ల‌డ‌వుతున్న క్ర‌మంలో తాజాగా ఓ న్యూస్ చానెల్ వాతావ‌ర‌ణ‌ రిపోర్ట్‌లో అనుకోకుండా 13 సెకండ్ల వ్య‌వ‌ధితో అశ్లీల వీడియో క‌నిపించ‌డం క‌ల‌క‌లం రేపింది. న్యూస్ ఛానెల్‌లో అశ్లీల కంటెంట్ ప్ర‌త్య‌క్ష‌మ‌వ‌డంతో స‌ద‌రు టీవీ చానెల్ న్యాయ వివాదంలో కూరుకుపోయింది. వాషింగ్ట‌న్‌లోని కెర్మ్ 2 న్యూస్ ఛానెల్‌లో ఈనెల 17 సాయంత్రం 6.30 గంట‌ల బులెటిన్‌లో యాంక‌ర్ వాతావ‌ర‌ణ రిపోర్ట్ చ‌దువుతుండ‌గా అశ్లీల కంటెంట్ ప్ర‌సార‌మైంది.

వాషింగ్ట‌న్ స్టేట్‌లో వాతావ‌ర‌ణం ఆహ్లాదంగా ఉంద‌ని మెటియ‌రాల‌జిస్ట్ మైఖేల్ బాస్ వీక్ష‌కుల‌కు వివ‌రిస్తుండ‌గా స్క్రీన్ కుడివైపు కార్న‌ర్‌లో అశ్లీల కంటెంట్ ప్లే అయింది. ఈ వీడియోను బాస్ కానీ ఆమె స‌హ యాంక‌ర్ కానీ గ‌మ‌నించ‌లేదు. సెన్సార్ చేసిన ఈ క్లిప్ ఆన్‌లైన్‌లో షేర్ చేయ‌గా ఇప్పుడ‌ది సోష‌ల్ మీడియాలో తెగ వైర‌ల‌వుతోంది. ఈ ఘ‌ట‌న‌పై అమెరిక‌న్ పోలీసులు ద‌ర్యాప్తు చేప‌ట్టారు.