ప్రముఖ దర్శకుడు ఎస్వీ కృష్ణారెడ్డి ఆరేళ్ల విరామం తర్వాత మళ్లీ మెగాఫోన్ పట్టారు. ఆయన దర్శకత్వంలో ‘ఆర్గానిక్ మామ, హైబ్రీడ్ అల్లుడు’ అనే చిత్రాన్ని రూపొందిస్తున్నారు. సొహైల్, అనన్య జంటగా నటిస్తున్న ఈ చిత్రంలో రాజేంద్రప్రసాద్ ముఖ్య పాత్రలో నటిస్తున్నారు. వరుణ్ సందేశ్ గెస్ట్ రోల్ చేస్తున్నారు. అమ్ము క్రియేషన్స్ సమర్పణలో కల్పన చిత్ర పతాకంపై కోనేరు కల్పన ఈ చిత్రాన్ని నిర్మిస్తున్నారు. ఈ సినిమా షూటింగ్ ప్రారంభోత్సవ కార్యక్రమం సోమవారం హైదరాబాద్లో జరిగింది. ఈ సందర్భంగా దర్శకుడు ఎస్వీ కృష్ణారెడ్డి మాట్లాడుతూ…‘మీ తరహా కామెడీ సినిమాలు రావడం లేదని చాలా మంది అడుగుతుండేవారు. నాకూ అదే ఫీలింగ్ ఉండేది. కథలు రాసుకుంటూ సరైన నిర్మాత కోసం వేచి చూశాను. ఈ క్రమంలో కొంత గ్యాప్ వచ్చింది. సోహైల్, అనన్య మంచి జోడీ కుదిరారు. తెలుగు ప్రేక్షకుల ఆదరణ మరోసారి ఇస్తారని కోరుకుంటున్నా’ అన్నారు. ఖుష్బూ, అలీ, సునీల్, రష్మీ, హేమ తదితరులు ఇతర పాత్రల్లో నటిస్తున్న ఈ చిత్రానికి సినిమాటోగ్రఫీ : సి రామ్ప్రసాద్, ఎడిటింగ్ : ప్రవీణ్ పూడి, సాహిత్యం : చంద్రబోస్.