చెకోవియన్‌.. మన రోహిత్‌

నటనపై ఆసక్తి ఆ కుర్రాడిని అమెరికా వరకు తీసుకెళ్లింది. అక్కడి రంగస్థలంపై తెలుగువాడి సత్తా నిరూపించింది. హైదరాబాద్‌ ప్రగతినగర్‌కు చెందిన రోహిత్‌ గచ్చిబౌలిలోని దాదాసాహెబ్‌ ఫాల్కే స్కూల్‌ ఆఫ్‌ ఫిల్మ్‌ స్టడీస్‌ నుంచి నటనలో పట్టా అందుకున్నాడు.

నటనపై ఆసక్తి ఆ కుర్రాడిని అమెరికా వరకు తీసుకెళ్లింది. అక్కడి రంగస్థలంపై తెలుగువాడి సత్తా నిరూపించింది. హైదరాబాద్‌ ప్రగతినగర్‌కు చెందిన రోహిత్‌ గచ్చిబౌలిలోని దాదాసాహెబ్‌ ఫాల్కే స్కూల్‌ ఆఫ్‌ ఫిల్మ్‌ స్టడీస్‌ నుంచి నటనలో పట్టా అందుకున్నాడు. ఆ తర్వాత, తన ఆరాధ్య రంగస్థల నటుడు, దర్శకుడు లీ స్ట్రాస్‌బెర్గ్‌ పేరిట న్యూయార్క్‌లో నెలకొల్పిన థియేటర్‌-ఫిల్మ్‌ ఇన్‌స్టిట్యూట్‌లో చేరాడు. శిక్షణలో ఉండగానే ఎమెలీ డి పైవా, ఎర్మెటె డి బోనితో స్నేహం కుదిరింది. ముగ్గురూ కలిసి ‘ది చెకోవియన్స్‌’ పేరుతో థియేటర్‌ సంస్థ నెలకొల్పారు. విఖ్యాత నాటకాల ప్రదర్శనలు మొదలుపెట్టారు. అన్నీ విమర్శకుల ప్రశంసలు అందుకున్నాయి. ముగ్గురూ కూడా క్లాసిక్‌గా పేరున్న ‘ది చెర్రి ఆర్చర్డ్‌’ నాటకాన్ని ఈ తరానికి కొత్తగా పరిచయం చేయాలనే సంకల్పంతో ఉన్నారు.

రచయిత, దర్శకుడు రాబిన్సన్‌ రూపొందించిన ‘వై’ నాటకంలో ప్రధాన పాత్ర పోషించి అందరి దృష్టినీ ఆకర్షించాడు రోహిత్‌. నాటకాల్లో రాణిస్తూనే సినిమాల్లోనూ తన అదృష్టాన్ని పరీక్షించుకుంటున్నాడు ఈ తెలంగాణ బిడ్డ. పలు ప్రాజెక్టుల్లో కీలకంగా వ్యవహరిస్తున్నాడు. ‘ఇన్‌ ది స్టిల్‌ ఆఫ్‌ ది నైట్‌’ చిత్రానికి ఫొటోగ్రఫీ డైరెక్టర్‌గా పనిచేశాడు. రచయితగా, దర్శకుడిగా, నటుడిగా వివిధ పాత్రలు పోషిస్తున్న రోహిత్‌ స్వీయ దర్శకత్వంలో ‘వన్‌ లాస్ట్‌ సన్‌రైజ్‌’ ద్వారా తెరపై కనిపించాడు. ఈ ప్రయోగాత్మక చిత్రం ఫెస్టివల్‌ సర్క్యూట్‌లో పలు అవార్డులు సొంతం చేసుకుంది. ఇండో-ఫ్రెంచ్‌ ఇంటర్నేషనల్‌ ఫిల్మ్‌ ఫెస్టివల్‌లో ఉత్తమ మౌన లఘుచిత్రాల విభాగంలో పురస్కారాన్ని అందుకుంది.