రామారావు ప్రభుత్వ అధికారి. కర్తవ్య నిర్వహణలో రాజీలేని ధోరణి కనబరుస్తుంటాడు. అన్యాయాల్ని ప్రశ్నిస్తూ ప్రత్యర్థుల పాలిట సింహస్వప్నంలా పేరు తెచ్చుకుంటాడు. ఆయన కథేమిటో ‘రామారావు ఆన్డ్యూటీ’ సినిమాలో చూడాల్సిందే అంటున్నారు శరత్ మండవ. ఆయన దర్శకుడిగా పరిచయమవుతున్న ఈ సినిమాలో రవితేజ కథానాయకుడిగా నటిస్తున్నారు. సుధాకర్ చెరుకూరి నిర్మాత. ప్రస్తుతం హైదరాబాద్లో యాక్షన్ ఘట్టాల్ని తెరకెక్కిస్తున్నారు. మార్చి 25న చిత్రాన్ని విడుదల చేయబోతున్నారు. సోమవారం కొత్త పోస్టర్ను విడుదల చేశారు. ‘యథార్థ సంఘటనల ఆధారంగా ఈ సినిమాను తెరకెక్కిస్తున్నాం. రవితేజ పాత్ర కొత్త తరహాలో ఉంటుంది. వేణు తొట్టెంపూడి ప్రధాన పాత్రలో కనిపిస్తారు’ అని చిత్రబృందం తెలిపింది. దివ్యాంక కౌశిక్, రజిషా విజయన్, వేణు తొట్టెంపూడి, నాజర్, నరేష్, పవిత్రా లోకేష్ తదితరులు నటిస్తున్న ఈ చిత్రానికి సినిమాటోగ్రఫీ: సత్యన్ సూర్యన్, సంగీతం: సామ్ సీఎస్, నిర్మాణ సంస్థలు: ఎస్ఎల్వీ సినిమాస్, ఆర్టీ టీం వర్క్స్, కథ, స్క్రీన్ప్లే, మాటలు, దర్శకత్వం: శరత్ మండవ.