Alia Bhatt | వాడిన పూలపై ఆలియా పెట్టుబడి!

ఫూల్‌.కొ.. ఐఐటీ- కాన్పూర్‌ సహకారంతో నడుస్తున్న ఓ స్టార్టప్‌. దీన్ని అంకిత్‌ అగర్వాల్‌ అనే ఇంజినీర్‌ నెలకొల్పాడు. కాన్పూర్‌లో గంగా నది ఒడ్డున ఉన్న దేవాలయాల్లో పూజల తర్వాత పూలను వృథాగా పారేసేవారు. కొండలా పేరుకుపోతున్న ఆ పుష్ప వ్యర్థాలను చూసినప్పుడు.. వాటిని రీసైకిల్‌ చేసి సుగంధ పదార్థాలుగా, వర్మి కంపోస్ట్‌గా మారిస్తే ఎలా ఉంటుందన్న ఆలోచన వచ్చింది అతడికి. అంతేకాదు ఈ సంస్థ జంతు చర్మాలకు ప్రత్యామ్నాయంగా ‘ఫ్లెదర్‌’ అనే పేరుతో పూలతో చేసిన చర్మంలాంటి ఉత్పత్తినీ అందుబాటులోకి తెచ్చింది. పర్యావరణ అభిమాని అయిన బాలీవుడ్‌ హీరోయిన్‌ ఆలియా భట్‌ తాజాగా ఫూల్‌.కొ స్టార్టప్‌లో పెట్టుబడి పెట్టడం గమనార్హం. ‘పూలను రీసైకిల్‌ చేసి తోలుకు ప్రత్యామ్నాయాన్ని కనిపెట్టాడంటేనే అంకిత్‌ దార్శనికత తెలుస్తున్నది. పైగా ఈ సంస్థ మహిళలకు ఉపాధిని కల్పిస్తున్నది. సామాజిక బాధ్యత కలిగిన ఇన్వెస్టర్‌గా నాకు నచ్చిన అంశాలు ఇవి’ అని ప్రశంసించారామె.