Visit:
న్యూఢిల్లీ, నవంబర్‌ 30: ఇకపై సిమ్‌ ఉంటేనే వాట్సాప్‌, టెలిగ్రామ్‌లు పనిచేస్తాయి. మెసేజింగ్‌ యాప్‌లైన వాట్సాప్‌, టెలిగ్రామ్‌, సిగ్నల్‌, స్నాప్‌చాట్‌, షేర్‌ చాట్‌, జియోచాట్‌, అరైట్టె, జోష్‌లకు కేంద్ర ప్రభుత్వం శనివారం ఆదేశాలు జారీ చేసింది. సిమ్‌ యాక్టివేట్‌ అయి ఉన్న మొబైల్స్‌లో మాత్రమే ఈ యాప్‌లు పనిచేయాలని స్పష్టం చేసింది. ఈ నిబంధన 90 రోజుల్లో అమల్లోకి వస్తుందని తెలిపింది. పనిచేయని నెంబర్లు, మోసాలు, స్పామ్‌లను తగ్గించడానికి, యూజర్‌ గుర్తింపు (కేవైసీ) పారదర్శకతను పెంచడానికి ఈ చర్యను తీసుకున్నట్టు ప్రకటించింది.
వినియోగదారుడి మొబైల్‌లోని రిజిస్టర్డ్‌ సిమ్‌ క్రియాశీలకంగా ఉన్నప్పుడు మాత్రమే ఈ యాప్‌లు పనిచేస్తాయని డిపార్ట్‌మెంట్‌ ఆఫ్‌ టెలికమ్యూనికేషన్‌ వెల్లడించింది. ఒక వేళ సిమ్‌ను తొలగించినా, పనిచేయకపోయినా యాప్‌లు కూడా ఆటోమెటిక్‌గా పనిచేయడం మానేస్తాయి. ఇక వెబ్‌ బ్రౌజర్ల ద్వారా లాగిన్‌ అయితే ఆయా మెసేజింగ్‌ వేదికల నుంచి ప్రతి ఆరు గంటలకోసారి లాగౌట్‌ అవుతుంది. తర్వాత క్యూఆర్‌ కోడ్‌ ధ్రువీకరణ ద్వారా మొబైల్‌ సిమ్‌తో తిరిగి లాగిన్‌ అవ్వాలి. ప్రస్తుతం సిమ్‌ లేకపోయినా, అది పనిచేయకపోయినా ఈ మెసేజింగ్‌ యాప్‌లను వాడుతున్నారు.
