Pollachi Assault Case: పొల్లాచి లైంగిక దాడి కేసు.. 9 మందిని దోషులుగా తేల్చిన కోర్టు

Pollachi Sexual Assault Case: పొల్లాచి లైంగిక దాడి, బెదిరింపుల కేసులో కోయంబ‌త్తూరు మ‌హిళా కోర్టు 9 మందిని దోషులుగా ప్ర‌క‌టించింది. జ‌డ్జి ఆర్ నందిని దేవి ఈ కేసులో తీర్పును వెలువ‌రించారు. 9 మంది నిందితుల‌కు జీవిత‌కాల శిక్ష‌ను విధించారు. బాధిత మ‌హిళ‌ల‌కు 85 లక్ష‌ల ప‌రిహారం ఇవ్వాల‌ని కోర్టు ఆదేశించింది.

కోయంబ‌త్తూరు: పొల్లాచి లైంగిక దాడి, బెదిరింపుల(Pollachi Assault Case) కేసులో 9 మందిని కోయంబ‌త్తూరు మ‌హిళా కోర్టు దోషులుగా ప్ర‌క‌టించింది. జ‌డ్జి ఆర్ నందిని దేవి ఈ కేసులో తీర్పును వెలువ‌రించారు. త‌మిళ‌నాడులో సంచ‌ల‌న సృష్టించిన ఆ కేసులో మొత్తం 9 మందిని అదుపులోకి తీసుకున్న విష‌యం తెలిసిందే. నేర‌పూరిత కుట్ర‌, లైంగిక వేధింపులు, అత్యాచారం, సామూహిక అత్యాచారం, బెదిరింపుల‌కు పాల్ప‌డిన‌ట్లు నిందితుల‌పై ఆరోప‌ణ‌లు ఉన్నాయి. 2016 నుంచి 2018 వ‌ర‌కు అమ్మాయిల‌ను బ్లాక్‌మెయిల్ చేసిన‌ట్లు కూడా ఆరోప‌ణ‌లు ఉన్నాయి.

బాధితుల్లో ఎక్కువ శాతం మంది కాలేజీ విద్యార్థినులు ఉన్నారు. ఓ విద్యార్థి ఫిర్యాదు ఆధారంగా పోలీసులు ఈ కేసులో విచార‌ణ చేప‌ట్టారు. అత్యాచార ఘ‌ట‌న‌ల‌పై రాష్ట్రంలో తీవ్ర విమ‌ర్శ‌లు వ‌చ్చాయి. రాష్ట్ర అసెంబ్లీలోనూ ఈ అంశాన్ని చ‌ర్చించారు. ఓ బాధితురాలికి చెందిన వీడియో క్లిప్ కూడా వైర‌ల్ అయ్యింది. రాష్ట్ర‌వ్యాప్తంగా ప్ర‌కంప‌న‌లు సృష్టించింది. మొద‌ట స్థానిక పోలీసులు ఈ కేసును డీల్ చేశారు. ఆ త‌ర్వాత ఈ కేసును సీబీ-సీఐడీకి ట్రాన్స్‌ఫ‌ర్ చేశారు. 9 మంది నిందితుల‌కు జీవిత‌కాల శిక్ష‌ను విధించారు. బాధిత మ‌హిళ‌ల‌కు 85 లక్ష‌ల ప‌రిహారం ఇవ్వాల‌ని కోర్టు ఆదేశించింది.

2019లో సీబీఐకి కేసును అప్ప‌గించారు. నిందితుల‌కు క‌ఠిన శిక్ష‌ను ప్ర‌క‌టించాల‌ని సీబీఐ న్యాయ‌వాది వాదించారు. మ‌హిళా బాధితుల‌కు న‌ష్ట‌ప‌రిహారం ఇవ్వాల‌ని కూడా సీబీఐ కోరింది. అరెస్టు అయిన వారిలో అన్నాడీఎంకే వ్య‌క్తి ఒక‌రు ఉన్నారు.