Vikatan Website: మోదీపై కార్టూన్‌.. విక‌ట‌న్ వెబ్‌సైట్ బ్లాక్

Vikatan Website: త‌మిళ మీడియా సంస్థ విక‌ట‌న్ వెబ్‌సైట్‌ను.. కేంద్రం బ్లాక్ చేసింది. దీంతో న్యాయ పోరాటం చేసేందుకు ఆ సంస్థ ప్ర‌య‌త్నిస్తున్న‌ది. ట్రంప్‌ను మోదీ క‌లిసిన అంశంపై వేసిన కార్టూన్ వివాదాస్ప‌దం కావ‌డంతో.. ఆ వెబ్‌సైట్‌ను కేంద్రం బ్లాక్ చేసింది.

చెన్నై: త‌మిళ మీడియా సంస్థ విక‌ట‌న్ వెబ్‌సైట్‌(Vikatan Website)ను.. కేంద్రం బ్లాక్ చేసింది. దీంతో న్యాయ పోరాటం చేసేందుకు ఆ సంస్థ ప్ర‌య‌త్నిస్తున్న‌ది. ఇటీవ‌ల అమెరికా అధ్య‌క్షుడు ట్రంప్‌, ప్ర‌ధాని మోదీ మ‌ధ్య భేటీ జ‌రిగిన విష‌యం తెలిసిందే. అయితే ట్రంప్ వ‌ద్ద మోదీ సంకెళ్ల‌తో కూర్చుకున్న‌ట్లు విక‌ట‌న్ వెబ్‌సైట్ ఓ కార్టూన్ వేసింది. ఫిబ్ర‌వ‌రి 10వ తేదీన ఆ కార్టూన్‌ను ప‌బ్లిష్ చేశారు. 15వ తేదీ నుంచి ఆ వెబ్‌సైట్ అందుబాటులో లేద‌ని విక‌ట‌న్ సంస్థ త‌న ఎక్స్ అకౌంట్‌లో పేర్కొన్న‌ది. కేంద్ర స‌మాచార‌, ప్ర‌సార‌శాఖ తీసుకున్న నిర్ణ‌యం వ‌ల్ల వెబ్‌సైట్ బ్లాక్ అయిన‌ట్లు విక‌ట‌న్ తెలిపింది. ఎటువంటి సమాచారం ఇవ్వ‌కుండానే సైట్‌ను బ్లాక్ చేశార‌ని వెల్ల‌డించారు.

వెబ్‌సైట్ బ్లాక్ చేసిన త‌ర్వాత ఫిబ్ర‌వ‌రి 20వ తేదీన విచార‌ణ చేప‌ట్టారు. భావ స్వేచ్చ‌తో ఆ కార్టూన్ వేసిన‌ట్లు విచార‌ణ స‌మ‌యంలో విక‌ట‌న్ త‌న వాద‌న‌ను స‌మ‌ర్థించుకున్న‌ది. అయితే ఫిబ్ర‌వ‌రి 25వ తేదీన మాత్ర‌మే త‌మ‌కు కేంద్ర స‌మాచార‌, ప్ర‌సార‌శాఖ నుంచి అధికారిక ఆదేశాలు అందిన‌ట్లు విక‌ట‌న్ వెల్ల‌డించింది. వెబ్‌సైట్ బ్లాక్ చేసిన అంశంలో న్యాయ నిపుణుల అభిప్రాయాలు తీసుకుంటున్న‌ట్లు విక‌ట‌న్ పేర్కొన్న‌ది. మ‌ళ్లీ వెబ్‌సైట్‌ను ప్రారంభించేందుకు చేప‌ట్టాల్సిన చ‌ర్య‌ల గురించి ఆలోచిస్తున్న‌ట్లు ఆ సంస్థ తెలిపింది.

Vikatan is now consulting legal experts to determine appropriate next steps. The publication is pursuing all legal avenues to both defend freedom of expression and restore access to the website.#VikatanForFreedomOfExpression | #VikatanCartoonRow | #AnandaVikatan pic.twitter.com/jV1IK0EvOG

— விகடன் (@vikatan) February 27, 2025