Supreme Court | సుప్రీంకోర్టు కీలకమైన ముందడుగు వేసింది. కోర్టుల్లో కేసుల విచారణ, తీర్పుల్లో మహిళలపై లింగ వివక్ష లేకుండా నిషేధిస్తూ నిర్ణయం తీసుకున్నది. విచారణ సమయంలో మహిళల ప్రస్తావనలో ఉపయోగించాల్సిన పదాలు, వ్యాఖ్యలకు సంబంధించి ఓ హ్యాండ్బుక్ను సర్వోన్నత న్యాయస్థానం బుధవారం విడుదల చేసింది. కోర్టు తీర్పు వెలువరించే సమయంలో అనుచిత పదాలు వాడకుండా ఉండేందుకు న్యాయమూర్తులకు తగు సూచనలు చేసింది.
‘హ్యాండ్బుక్ ఆన్ కంబాటింగ్ జెండర్ స్టీరియోటైప్స్’ పేరిట 30 పేజీల పుస్తకాన్ని సీజేఐ జస్టిస్ డీవై చంద్రచూడ్ ఆవిష్కరించారు. కోర్టులు గతంలో ఇచ్చిన తీర్పుల్లో మహిళలను ప్రస్తావిస్తూ చేసిన అనేక అనుచిత పదాలను హ్యాండ్బుక్లో సుప్రీంకోర్టు హ్యాండ్బుక్లో పొందుపరుస్తూ.. వాటి బదులుగా వాడాల్సిన పదాలను సూచించింది. కోర్టు తీర్పుల సమయంలో మహిళపై వివక్ష చూపే విధంగా వినియోగించే పదాలు సరైనవి కావని, అయితే, ఆ తీర్పులను విమర్శించడం పుస్తకం ఉద్దేశం కాదన్నారు. లింగత్వానికి సంబంధించి మూసపద్ధతులు ఎలా ఆచరణలో ఉన్నాయో చెప్పేందుకే హ్యాండ్ బుక్ను రూపొందించినట్లు పేర్కొన్నారు.
లింగ వివక్షకు నిర్వచనం, న్యాయాధికారుల్లో అవగాహనను పెంపొందించడం ఈ బుక్లక్ష్యమని సీజేఐ పేర్కొన్నారు. మహిళలపై మూసధోరణిలో వాడే పదాలను గుర్తించేందుకు న్యాయమూర్తులకు ఇది ఎంతో ఉపయోగపడుతుందని, సుప్రీం కోర్టు వెబ్సైట్లో హ్యాండ్బుక్ అందుబాటులో ఉంటుందని తెలిపారు. ఈ 30 పేజీలతో కూడిన హ్యాండ్ బుక్ను మహిళా న్యాయమూర్తుల కమిటీ రూపొందించింది. కమిటీలో జస్టిస్ ప్రభా శ్రీదేవన్, జస్టిస్ గీతా మిట్టల్, ప్రొఫెసర్ జుమా సేన్ ఉన్నారు. అలాగే కమిటీకి కలకత్తా హైకోర్టుకు చెందిన జస్టిస్ మౌషుమీ భట్టాచార్య నేతృత్వం వహించారు.